مه‌حموود ڕه‌حمه‌ت پوور

لە دەفتەری سەردەمی شاعیریم:
شێعرێک بۆ باڵای شەهیدێکی نیشتمان
قادر وریا
پاییزی 1360 دوای ئەوەی سپای پاسداران‌و ئەرتەشی کۆماری ئیسلامی‌و چاوساغە کوردەکانیان، لە گەلەکۆمەگییەکی نەخشەبۆ کێشراو‌دا، زۆر ناوچەی سەرووی ڕۆژهەڵاتی کوردستان‌و یەک لەوان شار‌و ناوچەی شنۆیان لە دەست هێزی پێشمەرگە، دەرهێنا‌و دەسەڵاتی جەهەننەمیی خۆیان لێ جێگیر کرد، کۆمیتەی شارستانی شنۆ‌و هێزی سمکۆ لە ناوچەی لاجان(سەر بە نەغەدە‌و پیرانشار) گیرسانەوە‌و بنکەکانی خۆیان لە گوندەکانی ئەو ناوچەیە دانا. منیش کە ئەو کات تەمەنم 18 ساڵ بوو، هاوکات هەم ئەندامی کۆمیتەی حیزبیی ناوچەی حەسەننووران‌و هەم بەرپرسی یەکیەتیی لاوانی دیموکرات لە ناوچەی حەسەننووران بووم، لە گەڵ هاوکارە حیزبییەکانم لە گوندی “دەشتی قوڕێ” گیرسامەوە. باسی باشیی ئەندامانی بنەماڵەی خانەخوێی خۆم با قەرز بێ لە سەرم بۆ وەختێکی دیکە. دوای ماوەیەک مانەوە لە دەشتی قوڕێ بۆ سەردانی کۆمیتەی بەڕێوەبەریی گشتیی یەکیەتیی لاوانی دیموکرات، چوومە دۆڵی خدراوێ. کاک کەریم ئەڵلاوەیسی‌و شەهید ڕەحمان سۆفیزادە‌و هاوڕێیەکی زۆر خۆشەویستم کە ئەویش ئەندامی بەڕێوەبەریی گشتی بوو، زۆریان هەوڵ لە گەڵ دام کە لە بەڕێوەبەریی گشتی بمێنمەوە‌و ببم بە هاوکاریان لە دەرکردنی یەکەم ژمارەی گۆڤاری “لاوان”دا. تاسە‌و خولیای زۆرم بۆ بەشداری لە کاری نووسین‌و،هاندان‌و پێشوازیی ئەو دۆستانە بۆ مانەوە لە لایان، هەر وەها سروشتی جوانی ئەو دۆڵە پڕ دارودرەخت‌و ئاوە‌و، کتێبخانەیەکی گەورە لەو بنکەیە کە بەشێکی زۆری کتێبەکانی لە لایەن کاک برایم لاجانی‌و بە ئیمزای ئەو پێشکەشی یەکیەتیی لاوان کرابوون، دڵیان نەرم کردم. هەر بۆیە خۆم بۆ بەڕێوەبەریی گشتیی یەکیەتیی لاوانی دیموکرات کە بنکەکەی لە دۆڵی خدراوێ(سەر ڕێگای پیرانشار بۆ شارۆچکەی میراوێی سەردەشت)بوو، نەقڵ کرد. ڕۆژێک لە ڕۆژەکانی- وابزانم – مانگی خەزەڵوەڕ کە بە عادەتی ڕۆژانە گوێمان دابووە بەرنامەکانی ڕادیۆی دەنگی کوردستانی ئێران، هەواڵی شەڕی پێشمەرگەکانی هێزی سمکۆ‌و نحۆ لە گەڵ پەلاماردەرانی سەر بە ڕێژیم لە داوێنەکانی کێلەشینم بیست. ژمارەی هەموو شەهیدەکانی ئەو زنجیرە تێکهەڵچوونانەم لە بیر نییە بەڵام باشم لە بیرە کە سەروان حاتەم دوعاخوان فەرماندەری هێزی نەحۆ‌و، مەحموود ڕەحمەتپوور ئەندامی هەیئەتی ئیجرایی کۆمیتەی شارستانی شنۆو جێگری فەرماندەی هێزی سمکۆ دوو لەو شەهیدانە بوون. بەو هۆیەوە کە مەحموود ڕەحمەتپوورم پێشتریش دەناسی، شەهیدبوونەکەی پتر کاری تێ کردم. نازانم هەر ئەو شەوە یا بۆ بەیانیی زووی ئەو شەوە بوو کە هەستی خۆم بەرامبەر مەرگی ئەو کەسە دیارەی کۆمیتەی شارستانی شنۆو هێزی سمکۆ، بە نووسینی پارچە شێعرێک، دەربڕی. لە بیرمە ئەو کات، ئەم شیعرەی خۆم زۆر پێ جوان بوو. بۆ ڕادیۆی دەنگی کوردستانی ئێرانم نارد‌و لە بەرنامەی گۆشەی پێشمەرگە کە دواتر بە کاروانی شەهیدان ناودێر کرا، خوێندرایەوە. ئینتیشاراتی کۆمیتەی شارستانی شنۆ ئەم شێعرەمیان لە گەڵ وێنەی شەهیدەکە، بە شێوەی تراکت چاپ کردبوو‌و لە بنکەکانی پێشمەرگە لە دیوار درابوو. ساڵانێک دواتر کە لە نزیکەوە بە خزمەت مامۆستا عەبدوڵلا حەسەنزادە گەیشتم، بە بۆنەی ئەو شێعرە دەسخۆشیی لێ کردم. ئەوە لە حاڵێک دابوو کە هەر نەشم دەزانی مامۆستا ئەو شێعرەی دیوە یا کەوتووەتە بەر دڵێ! ئێستا کە پاش 35 ساڵ، دەیخوێنمەوە لە چاو تەمەن‌و ئەزموونیی ئەدەبیی ئەو کاتی خۆم، پێم وایە لە گەڵ هەموو ساددەییەکەی دا،شتێکی خراپم نەگوتوە. خۆ ئەگەر کرچ‌و کاڵ‌و پڕ لە ناتەواوییش بێ، لای من هەر خۆشەویستە، چونکە یادگار‌و ئاوێنەی هەست‌و بیرکردنەوە‌و ڕوانینی ئەو ساتەوەختەی منە. ئەم ڕۆژانە بیستم کە “کوردکاناڵ” نیازی یادکردنەوەی شەهیدە مەحموود ڕەحمەتپووری هەیە. بە دەرفەتم زانی بگەڕێمەوە سەر ئەم شێعرەی خۆم‌و تایپی بکەم و لە گەڵ ئەم بە سەر هاتەی دا، بیخەمە بەر سەرنجی دۆستان. وەک سەردەمی شاعیربوونیشم بە ناوی شێعریی ئەو کاتم(ع.وریا) بڵاوی دەکەمەوە. هیوادارم بە دڵتان بێ:

یادی نەمرێک
(بۆ شەهید مەحموود ڕەحمەتپوور)

کە مەتەرێزێک دەنەخشێ
بە خوێنی خۆ بەختکەرێک،
بە دەستی خۆی گیان دەبەخشێ
بەو وڵاتە، کۆڵنەدەرێک:
***
کە ئاوا دەبێ ئەستێرەی
ژینی نەمری پاڵەوانێک،
هەڵ دەگرێ چاوی لە سێرەی
هیوای گەل و نیشتمانێک:
***
کە منداڵێکی بابکوژراو
لە گەڵ دایکەکەی ڕەشپۆشی،
لە سەر گۆڕێ چاو پڕ لە ئاو
دەوەستن بە دڵ پەرۆشی:
***
کە دەستڕێژی گوللەی جاشێ
سینگێک وەک بێژینگ لێ دەکا،
کە نیشتمان تەرمی باشێ
لە نێو دڵی دا جێ دەکا:
***
کە وێکڕا فرمێسک دەڕێژن
پیر و مناڵ و لاوەکان،
تەرمی پێشمەرگە دەنێژن
هەژارەکان، چەوساوەکان:
***
کە مەتەرێز دەنەخشێنێ
خوینی پیرۆزی ڕۆڵەیەک،
قەڵای ستەم دەلەرزێنێ
تووڕەیی و سامی تۆڵەیەک:
***
کە شەهید بوونی دلێرێک
دەنگ دەداتەوە لە وڵات دا،
کە ئازایەک، بێچووە شێرێک
گیانی لە پێناو خەبات دا:
***
من مەحموودم دێتەوە بیر
پێشمەرگەی قارەمان و ژیر،
تۆڵە ئەستینی بە ناوبانگ،
شۆڕشگێڕەکەی ڕووناکبیر.
***
ع.وریا
دۆڵی خدراوێ،
پاییزی 1360(1981)

ووشەیەک یا ناوێک بنوسە کە بەدوایدا دەگەڕێیت