عێزه‌ت په‌یڕه‌وان
شه‌هید عێزه‌ت په‌یڕه‌وان له بنه‌ماڵه‌ی سڵێمانبه‌گی بانه‌یه و سێ یه‌م شه‌هیدی بنه‌ماڵه‌كه‌یانه. له ساڵی 1954 له گوندی ئارمرده‌ی سه‌ر به ناوچه‌ی بانه له بنه‌ماڵه‌یه‌كی مام ناوه‌ندی له دایك بووه. .
كاتێك ته‌مه‌نی گه‌یشۆته ئه‌وه‌ی رێگه‌ی قوتابخانه بگرێته به‌ر به هۆی گیرو گرفتی بنه‌ماڵه‌كه‌ی نه‌یتوانیوه بخوێنێ. عێزه‌ت ده ساڵ بووه كه باوكی كۆچی دوایی ده‌كات و ئه‌ركی به‌خێو كردنی دایك و دوو خوشكی ده‌كه‌وێته سه‌ر شان. له‌و كاته‌دا له‌شی ناسكی ده‌خاته به‌ر كاری تاقه‌ت بڕوو له توانا به‌ده‌ر, ناهێڵی له خوێندن بێ به‌ش بێ و به‌م مه‌به‌سته شه‌وانه له قوتابخانه‌ی ئارمرده ده‌ست به خوێندن ده‌كات. به‌ڵام به هۆی دوور بوونی ماڵه‌كه‌یان له قوتابخانه و كاری له راده‌به‌ده‌ری رۆژانه ته‌نیا توانی تا پۆلی پێنجه‌می سه‌ره‌تایی ده‌رس بخوێنێ . عێزه‌ت بۆ به‌ڕێوه بردنی ژیانی دایك و دوو خوشكی و دواتر دوای پێك هێنانی ژیانی هابه‌ش له ته‌مه‌نی پازده ساڵیدا له هیچ كارێكی شه‌رافه‌تمه‌ندانه‌ی وه‌ك :-جوتیاری, شوانی, دووكانداری, كرێكاری, هه‌تا كار له ئیداره‌ی جه‌نگه‌ڵبانی شاری بانه و شاگرد شۆفیری و میكانیكی سه‌رئه‌نجام شوغڵی رانه‌نده‌گی غافڵ نه‌بوه كاری كردوه. به هۆی بوونی ئاغا و ده‌ره‌به‌گی ده‌سه‌ڵاتدار له ئارمرده بنه‌ماڵی عێزه‌ت له‌سه‌ر نه‌دانی باج و پیتاك مل رانه كێشان بۆ داخوازییه‌كانی ئاغا كه‌ند و كۆسپی زۆریان هاتۆته سه‌ر رێ و بۆ ماوه‌یه‌كی زۆر ئازار ده‌دران له به‌ر چاوی خه‌ڵكی لێده‌دران و زۆر جاریش به هۆی جه‌ندرمه سه‌ركوتكه‌ره‌كانی رژیمه‌وه بێحورمه‌تیان به بنه‌ماڵه‌ی شه‌هید عیزه‌ت ده‌كرد و ته‌نانه‌ت ره‌وانه‌ی زیندانیان ده‌كرد به‌ڵام سه‌ره‌ڕای ئه‌و هه‌موو زه‌برو زه‌نگه حازر نه‌بوون ملكه‌چی ئاغا بن و رقێكی پیرۆز له ئاغاو جه‌ندرمه‌كانی رژیم له دڵیاندا بوو.
شه‌هید عیزه‌تی په‌یڕه‌وان هه‌ر له منداڵیه‌وه له گه‌ڵ زوڵم و زۆر ئاشنایه‌تی هه‌بوو نا یه‌كسانی و بێ عه‌داڵه‌تی به هه‌موو ده‌ماره‌كانیه‌وه هه‌ست پێكردبوو. بۆیه له راپه‌ڕینی گه‌لانی ئێران دژی رژیمی پاشایه‌تی ئێران چالاكانه به‌شداری ده‌كرد و بۆ زیاتر ده‌ڕبڕینی رق و بێزاری خۆی دژی ئه‌و رژیمه دیكتاتۆره خه‌ڵكه به‌ماشینه‌كه‌ی خۆی له دێهاته‌كانی ده‌ورووبه‌ره‌وه ده‌هێنا شاری بانه تا ریزی خۆپیشانده‌ران به هێزتر بكات و بۆ خۆشی به تفه‌نگێكی بڕنه‌و كه له شاری سه‌رده‌شت كڕیبووی ئه‌مجار به شێوه‌ی چه‌كداری پارێزگاری له خۆپیشانده‌رانی شاری بانه ده‌كرد. به دوای رووخانی رژیمی په‌هله‌وی دا له ساڵی 1979 دا خه‌باتی حیزبی دیموكڕات له قۆناغی نهێنی هاته ده‌روو به ره‌سمی بنكه‌ی له شاره‌كانه كوردستان دامه‌زراند. كاك عێزه‌ت وه‌ك كوردێكی زوڵم لێكراو و خاوه‌نی هه‌ستی كوردایه‌تی بۆ به‌دیهێنانی ئامانجه‌كانی یه‌كجاره‌ی, رێبازی حیزبی دیموكڕاتی کوردستانی هه‌ڵبژارد..
له‌ساڵی 1979به ره‌سمی بوو به پێشمه‌رگه و له هێزی شه‌هیدانی وێردی ئه‌وكاتدا سازمان درا. هاورێ عێزه‌ت له ماوه‌ی پێشمه‌رگایه‌تی دا زۆر زوو نیشانی دا كه رۆڵه‌یه‌كی فیداكاروو به وره و خاوه‌ن نه‌زه‌ر و فه‌رمانده‌یه. شۆڕشگێرێكی كارامه و كارلێهاتوویه و هه‌ر به هۆی ئه‌و تایبه‌تمه‌ندیانه زۆر زوو پله‌كانی پێشمه‌رگایه‌تی له كومیته شارستانی بانه هێزی شه‌هیدانی وێردی تا ساڵی 1986 ئاوا به سه‌ر كه‌وتنه‌وه تێپه‌ڕ كرد: پاییزی 1979 تا ساڵی 1981 كرا به سه‌رده‌سته, ساڵی 1981 تا ساڵی 1982 كرابوو به فه‌رمانده‌ی لك. له كونفڕانسی كومیته شارستان له ساڵی 1981 دا بۆ كۆنگره‌ی پێنج وه‌ك ئه‌ندامی كومیته‌ی شارستان هه‌ڵبژێردرا . له ساڵی 1982 تا ساڵی 1983كرا به به‌رپرسی كومیته‌ی ناوچه‌ی ئاربه‌با واته (سووركێو) . ساڵی 1983 تاساڵی 1984 به جێگری فرمانده‌ی هێزی شه‌هیدانی وێردی دیاری كرا. ساڵی 1984 تا 1986 بوو به هه‌یئه‌تی ئیجرایی كومیته‌ی شارستانی بانه.
ماوه‌ی هه‌ڵسوڕانی بێوچانی له به‌شی نیزامی دا له 182 عه‌مه‌لیات و شه‌ڕ به‌ره‌نگاری له گه‌ڵ هێزه په‌لامارده‌ره‌كان دا به‌شداری كردوه.
له شه‌ڕه‌كانی:- ئاربه‌با, ناوشار, ئارمرده, چه‌می بۆیه‌ن, قه‌زوانه گه‌وره, هه‌ژده دۆڵان, مه‌رده‌كان, پشتی سوێروێ, كه‌لیخان و كه‌لوره شاهیدی قاره‌مانی و له خۆ بردوویی ئه‌و خه‌باتگێڕه‌ن. جیا له ناوچه‌كانی دیكه‌ی‌كوردستانیش له‌م ناوچانه چالاكانه دژی دوژمن خه‌باتی كردوه:- شه‌ڕه‌كانی نه‌غه‌ده, سه‌قز, سنه, كامیاران, جاده‌ی مه‌ریوان, بانه, دزڵی مه‌ریوان, جاده‌ی بانه, سه‌رده‌شت.
له‌سه‌جه‌می هه‌موو ئه‌و شه‌ڕانه‌دا سێ جار له ساڵه‌كانی 80 و 81 دا له ئاربه‌با, مه‌رده‌كانی زه‌رواو و پشت به‌رده‌ڕه‌شی نزیك سوێروێ بانه بریندار ده‌بێ كه دواجار ده‌بێته هۆی له ده‌ست دانی چاوێكی و چاوه‌كی دیكه‌شی زامدار ده‌بێ. ساڵی 1986 تا ساڵی 1988 به هۆی ناڕه‌حتی چاوی له سه‌ر داوای دوكتورو هه‌روه‌ها به ئاگاداری حیزب له ماڵی خۆی له یه‌كێك له شاره‌كانی باشووری كوردستان داده‌نیشێ و ده‌ست ده‌كا به ژیانی ئاسایی به‌ڵام له‌م ماوه‌یه دا په‌یوه‌ندی خۆی‌له گه‌ڵ حیزب ناپچڕێنێ و هاوكاری خۆی هه‌روه‌ها درێژه پێده‌دا. له ساڵی 1988 ده‌گه‌ڕێته‌وه نێو حیزب و به وره‌یه‌كی به‌رزتر له كومسیۆنی كۆ مه‌ڵایه‌تی بۆ كارو باری نه‌خۆشه‌كان له په‌یوه‌ندیه‌كانی ده‌ره‌وه ده‌ست ده‌كاته‌وه‌به كار و به سه‌ركه‌وتووییه‌وه ئه‌م قۆناغه‌ش له كاری حیزبی ده‌بڕێ..
له ساڵی 1990نه‌قڵی كومسیۆنی‌ماڵی‌به شی خه‌ده‌مات ده‌كرێ و له به‌شی ساختومانه به‌و په‌ڕی دڵسۆزی و كارئامه‌ییه‌وه ئه‌ركه حیزبییه‌كانی به رێوه ده‌بات. شه‌هید عێزه‌تی په‌یڕه‌وان له ماوه‌ی كاری له ناو حیزب دا نیشانی دا كه ئینسانێكی لێهاتوو شاره‌زایه بۆیه خۆی زۆر زیاتر له‌و كاره‌ی پێیان ده‌سپارد ماندوو ده‌كرد. به هۆی‌لێوه‌شاییه‌وه له ساڵی 1991 وه‌ك شۆڕای یی‌كێك له بنكه‌كانی سه‌ر ده‌فته‌ری سیاسی هه‌ڵده‌بژێردرێ و چالاكانه له‌م به‌شه‌دا هه‌ڵده‌سوڕێ و ره‌نگێكی نوێ به كاری شوڕا ده‌داو به راستی نموونه‌ی ره‌مزی كاری هه‌ره‌وه‌رزی و رۆحسوكیه. له مه‌یدانی به‌ربه‌ره‌كانی خه‌بات دا وه‌ك فه‌رمانده‌یه‌كی لێهاتوو و به ئه‌زموون بوو. خاوه‌ن نه‌زه‌ر و به‌رنامه بوو. زیان و قازانجی عه‌مه‌لیاته‌كانی ده‌ستنیشان ده‌كرد و ووره و توانای ده‌دا به هاوسه‌نگه‌ره‌كانی جیا له‌وه‌ش بۆ بردنه‌سه‌ری زانیاری خۆی تێده‌كۆشا و نه‌زه‌ری خۆی به راشكاوی له‌سه‌ر گۆڕانكاریه سیاسیه‌كان و چۆنیه‌تی كاروو به‌ڕێوه چوونی ده‌ده‌بڕی. وه‌فادار بوو به رێبازی شه‌هیدان و درێژه دانی رێگای ئه‌وانی به ئه‌ركی پیرۆز و گه‌وره ده‌زانی.
شه‌هید عێزه‌ت له ماوه‌ی ته‌مه‌نی دا دووجار ژیانی هاوبه‌شی پێكهێناوه كه ئه‌نجامی ئه‌و ژیانه هاوبه‌شیانه‌شه‌ش كچ و چوار كوڕه كه هه‌ر كام له‌و منداڵانه خاوه‌ن بیر و باوه‌ڕی باوكیانن.
كاك عێزه‌ت له كۆڕی هاواڵانیشی دا هاوڕێیه‌كی به ئه‌مه‌ك و رفیقێكی خۆش مه‌شره‌ف بوو. خۆی به رفیقی هه‌موو هاوڕێیه‌كی حیزبی ده‌زانی له‌كاتی دانیشتن له گه‌ڵ دۆستانی, سه‌میمی و ده‌م به پێكه‌نین و قسه خۆش بوو. بۆیه هه‌موویان خۆشیان ده‌ویست رێزیان لێده‌گرت. له كاتی كار كردن دا ئینسانێكی جییدی به پشت و كار و ماندوو نه‌ناس بوو. ئه‌و تایبه‌ت مه‌ندیانه بوون به هۆی ئه‌وه كه له لای هه‌مووان خۆشه‌ویست بێ و جێگای رێز و حورمه‌تیان بێ. هه‌ر بۆیه له كۆچه ناوه‌خته‌كه‌ی دا كه‌س نه‌بوو بۆی نه‌گری و فرمێسكی بۆ هه‌ڵنه‌وه‌رێنێ و بۆی‌به داخ نه‌بێ . سه‌ره‌نجام له رۆژی هه‌ینی 10 ی خه‌زه‌ڵوه‌ری ساڵی 1371ی هه‌تاوی(1992.11.01) له كاتێكدا كه خه‌ریكی به‌ڕێوه‌بردن و یارمه‌تی دانی كاری هاوڕێیه‌كی حیزبی له یه‌كێك له بنكه‌كانی حیزبی دا ده‌بێ , به هۆی وه‌رگه‌ڕانی ماشین دڵی پڕ له هیوا و ئاواتی له‌كار ده‌كه‌وێ و چاوه زامداره‌كانی له‌سه‌ر یه‌ك داده‌نێ و ماڵئاوایی له حیزب و هاوڕێیانی و بنه‌ماڵه و دۆستانی ده‌كات و تێكه‌ڵ به كاروانی پڕ سه‌روه‌ری شه‌هیدانی رێگه‌ی ئازادی‌کوردستان ده‌بێ..
یادی به خێر بێ و رێگای پڕ رێبوار بێ. به‌ڕێز بێ یاد و بیره‌وه‌ری شه‌هید عێزه‌تی په‌یڕه‌وان و هه‌موو شه‌هیدانی سوورخه‌ڵاتی رێگای ئازادی.