مه‌لا ئیبراهیم مه‌سڵه‌حه‌ت
ساڵی 1942 له گوندی دۆڵهگهرمی ناوچه‌ی سه‌رده‌شت له بنه‌ماڵه‌یه‌کی دڵپاکی کورده‌واری‌دا کۆرپه‌یه‌ک له‌دایک بوو، که‌ناوی برایمی له‌سه‌ر دانرا و شۆره‌تی مه‌سله‌حه‌ت‌یش هه‌ر له بنه‌ماڵه‌که‌ی‌را پێی‌بڕا وپاشان له ره‌وتی ژیانی ئاسایی‌و سیاسی‌دا به مه‌لا برایمی دۆڵهگهرمی ناوبانگی ده‌رکرد.
ناوبراو وه‌ک زۆربه‌ی هه‌ره زۆری منداڵانی ئه‌و سه‌رده‌م، ته‌نیا توانی تا کلاسی شه‌شی سه‌ره‌تایی له قوتانخانه بخوێنێ. به‌ڵام مه‌لا برایم دوای قوتابخانه‌ش وازی له وه‌ده‌ست هێنانی زانست‌و زانیاری نه‌هێنا، بۆ ئه‌م مه‌به‌سته رووی له حوجره‌ی فه‌قێیان کرد، که ئه‌و ده‌م جگه‌له ده‌رسی ئایینی، له حوجره‌کاندا هه‌ستی نیشتمانپه‌روه‌ری‌و کوردایه‌تیش بره‌وی پێ‌ده‌درا. له حوجره‌ی فه‌قێیاندا، مه‌لا برایم هه‌ستی نیشتمانپه‌روه‌ری تێیدا به‌هێز بوو، زۆرتر زوڵم‌و زۆری دوژمنانی بۆ روون بۆوه.
گه‌شه سه‌ندنی هه‌ستی نیشتمانی‌و کوردایه‌تی ناوبراوی به‌ره‌و بیری سیاسی‌و خه‌بات بۆ رزگاری گه‌لی کورد هان‌دا. سه‌رئه‌نجام ساڵی 1963به شێوه‌ی ره‌سمی په‌یوه‌ندی به ته‌شکیلاتی حیزبی دێموکراتی کوردستانه‌وه کردو بوو به ئه‌ندام‌و تاساڵی 1978، واته تا کاتی روخانی رێژیمی پاشایه‌تی به نه‌هێنی خه‌باتی سیاسی‌و ته‌شکیلاتی له ناوچه‌ی سه‌رده‌شت کردوه. له‌ڕه‌وتی ئه‌و خه‌باته‌دا جاره‌ک بۆ ماوه‌ی نزیک یه‌ک ساڵ له لایه‌ن ساواکه‌وه گیراوه‌و زیندانی کراوه.
ساڵی 1968 ژیانی هاوبه‌شی په‌ک هێناوه. پێ‌ک هێنانی ژیانی هاوبه‌ش‌و په‌یدا بوونی منداڵ نه‌بوونه هۆی دوورکه‌وتنه‌وه‌ی ناوبراو له خه‌بات بۆ رزگاری گه‌له به‌شخوراوه‌که‌ی.
ساڵی 1978مه‌لا برایمی دۆڵهگهرمی وێرای سه‌رجه‌م تێکۆشه‌رانی گه‌لی کوردو دێموکرات له خه‌بات بۆ روخانی حکومه‌تی محمد ره‌زاشا دا به‌شداری چالاکانه‌ی کرد.
ساڵی 1979 هه‌تاوی کاتێک حیزبی دێموکراتی کوردستان خه‌باتی خۆی ئاشکرا کرده‌وه، مه‌لا برایم دۆڵهگهرمی به ره‌سمی چه‌کی پی‌رۆزی پێشمه‌رگایه‌تی بۆ دیفاع له مان‌و مه‌جودیه‌تی گه‌له‌که‌ی کرده شانی‌و تا ساڵی 1997ی زایینی بێ پسانه‌وه له خزمه‌ت حیزب‌و گه‌له‌که‌ی دابوو. ناوبراو که‌سایه‌تێکی کار لێهاتووی سیاسی نیزامی بوو، هه‌ر بۆیه له ماوه‌ی ژیانی سیاسی خۆی دا پله نیزامیه‌کانی پێشمه‌رگایه‌تی یه‌ک له دوای یه‌ک‌دا بڕی، له سه‌رجه‌م پله‌کانی، سه‌رپه‌لی، سه‌رده‌سته‌یی، سه‌رلکی‌و سه‌رئه‌نجام فه‌رمانده‌هێزی‌دا کار لێهاتوویی خۆی نیشان داوه، وه‌ک فه‌رمانده‌یه‌کی به‌وه‌ج‌و به توانا، هه‌م بۆ هێزی پێشمه‌رگه‌و هه‌م بۆ کۆمه‌ڵانی خه‌ڵک جێگه‌ی رێزو حورمه‌ت بوو. ناوبراو له بواری سیاسی‌و ته‌شکیلاتی‌دا، که‌سێکی به تواناو کارلێهاتوو بوو، هه‌ر بۆیه ساڵی 1980 له کۆنفرانسی حیزبی‌دا، له ناوچه‌ی سه‌رده‌شت وه‌ک ئه‌ندامی کۆمیته‌ی شارستانی سه‌رده‌شت هه‌ڵبژێردرا. هه‌رله ده‌ورانی پێشمه‌رگایه‌تیش‌دا جارێک به‌سه‌ختی بریندار بوو.
ساڵی 1997 وێرای ماڵ‌و منداڵی دوای ساڵانێکی زۆر خه‌بات‌و تێکۆشان، بارگه‌و بنه‌ی به‌ره‌و غوربه‌ت پێچایه‌وه‌و سه‌رئه‌نجام له وڵاتی سوئێد گیرسایه‌وه، به‌ڵام غوربه‌ت‌و ئاواره‌یی نه‌ک هه‌ر وره‌ی به ناوبراو به‌رنه‌دا به‌ڵکو نیشتمانی ئازیزمان، کوردستانی له لا خۆشه‌ویستتر کرد. هه‌ر بۆیه له وڵاتی سوئێدیش وه‌ک ئه‌ندامێکی دڵسۆزی حیزبی دێموکراتی کوردستان درێژه‌ی به خه‌بات‌و تێکۆشان داو و رزگاری گه‌لی کوردو گه‌رانه‌وه بۆ کوردستانی رزگار کراو یه‌کێک له هه‌ره ئاواته پیرۆزه‌کانی ناوبراو بوو، که‌چی مخابن نه‌خۆشی مه‌ودای نه‌دا تا ناوبراو پتر بژی‌و زیاتر خزمه‌تی حیزب‌و گه‌لی خۆی بکات‌و سه‌رئه‌نجام دوای یه‌ک ساڵ به‌ربه‌ره‌کانی له‌گه‌ڵ مه‌رگ، رۆژی 30/10/2004 دڵه پڕ له‌ئاواته‌که‌ی له شاری ئێره‌برۆی سوئێد له لێدان که‌وت‌و به دنیایه‌ک ئاوات‌و ئاره‌زوه‌وه ماڵ‌ئاوایی له بنه‌ماڵه‌و که‌س‌و کارو هاورێیانی حیزبی‌و سه‌رجه‌م گه‌لی کوردو خاکی کوردستان کرد.