avatar

کارۆ


سکانسی یەکەم
لەداڵانەکانی بەندیخانەی مەهاباد لەتەنیشت شارەوانی شار، ژمارەیەک پێشمەرگە کەلەبچە لەدەست دەهێندرێنە ژوور، پێشتر لەدادگای ئینقلابی مەهاباد سزای لەسێدارەدانیان بەسەردا سەپێندراوە. لەدوای ماوەیەکی زۆر گەرانەوەی پێشمەرگە بۆ ناوشار هۆمێدێکی گەورەی خستۆتە ناو دڵی خەڵک، لەزیندانی مەهابادیش زیندانبان و سەربازە کوردەکان هاتوونەتە پێشوازی ئەو پێشمەرگانە... ئەوانە ئەو پێشمەرگانەن کە دوێنێ ئێوارێ لەکۆڵان باسیان دەکرد، راست دەکەی... دوێنێ لەچواررای وەفاییش باس باسی ئەوانە بوو.... هەزار ‌حەیف دەلێن قازی شەریفی سزای لەسێدارەدانی بەسەردا سەپاندوون.... ئەوانە دیموکراتن،و هەزاران کەسی وا لەو پێناوەدا شەهیدبوونە، ئای بێدەسەڵاتیییییییی... هەزار حەیف...
هەر لەو زیندانەدا کارۆ رەسوڵی و لوقمان رەسوڵی لەسەربازی زۆرەملێدان، جا بەرپرسی زیندانیش لەرێگەی ئەوان بانگی پێشمەرگەکانی دەکرد، رۆژانە یەک دوو جار پێشمەرگەکان و کارۆو لوقمان بەیەکەوە بەداڵانەکاندا تێدەپەرین، پێشمەرگەکان چاوەرێی لەسێدارەدانن، و کارۆو لو‌قمانیش دڵەخۆرپەیەکی گەورە دایگرتوون، رەنگە هیچ یەک لەو شەوانە خەویان لێنەکەوتبێت...پێشمەرگە لەو زیندانەیە، کە من تێیدا سەربازم... چۆن دەکەرێ هەر نابێ چۆن وادەبێ... خۆ رەنگە ئەمرۆ و سبەی لەسێدارەیان بدەن... ئەو پێشمەرگانەی هەموو خەڵکی شار باسیان دەکات، لەسێدارە دەدرێن... چ بکەین.... هەر نابێ نا... بەڵام چۆن... ئەی ئەگەر پێیان زانی... جا ئەمجارە هەر پێنجمان لەسێدارە دەدەن... ئەخر ئەگەر هیچیش نەکەین خۆ ئەوان لەسێدارە دەدرێن.... خەریکە شێت دەبم، نا نا نا یان دەربازیان دەکەین، یانیش هەموومان بەیەکەوە شەهید دەبین.... ئیتر تەواو.
یەکێک لەو رۆژانەی کارۆ بەدوای یەکێک لەپێشمەرگەکاندا چووە، بۆ ئەوەی بۆ لای زیندانبانی ببات، لەگەرانەوەدا پێی دەلێ ئەگەر ئامادەبن، بە دەرگای پشتەوەدا دەربازتان دەکەم....چۆن... چاک خۆ خوێنی ئێمە لەهی ئێوە سوورتر نییە... ئامادە بن. کارۆ و لوقمان بڕیاری خۆیان داوە، یان ئەو پێشمەرگانە دەرباز دەکەن، یان ...هەرخوا دەزانێ چیان بەسەر دێت....
مانگ رێبەندانە...ساڵی ٢٠٠٣-یە،و شەوێک کارۆ و لوقمان هەموو قوفلەکانی زیندان بۆ پێشمەرگەکان دەشکێنن، و بەدەرگای پشتەوەی زینداندا پێشمەرگەکان رەزگار دەکەن، ئیتر رێگەی گەرانەوە نەماوە... کارۆ و لوقمان کەسەرباز بوون، دەبنە پێشمەرگی ئەو پێشمەرگانە..
سکانسی دووەم
سەرمایەکی تاقەت پرووکێنە، پەنجە پەنجەی پێ ناگیرێت، دەنگی کرپەی بەفری ژێر پێیان و هەناسەی ٥ پێشمەرگە نەبێ نابیسترێت، رۆژەکان لە ٤٠ تێپەریون،و بەپێیان لەو ساردوسەرمایەدا لە شاخەکاندا ماونەتەوە، کارۆ و لوقمان ٤٠ رۆژ پێشتر سەربازی زۆرەملێی ئێران بوون،و ئێستا خۆویست پێشمەرگەی سێ پێشمەرگەن. هیچیان نازانن لەو شاخوداخەدا و بەسەهۆڵبەندانە دەتوانن رزگاریان بێت، خۆ ئەگەر خۆفرۆشیش راپۆرتیان لێنەدەن، خۆ ئەگەر نەکەونە ژێر رەنووش، خۆ دوای ٤٠ رۆژ رەنگە لەبڕسان بمرن، یەک شت ناهێلێ ئەوان هیوابڕاوبن، خۆ ئەگەر ملیان بە چارەنووس دابا، ئێستا دەبووا لەژووری تاکە کەسی چاوەرێی لەسێدارەدان بان... بەڵام تەزووی ئەو سەرمایە ناگاتە ئەو خیانەتەی کەماڵ لەشار لەو پێشمەرگانەی کرد، خۆ ئەو جێ متمانەی رێکخستنەکانی ‌حزب بوو، بەڵام بەگرتنی داین...ئاخ رۆژێکم مابێ بۆ ئەوم ماوە... دەی خۆ ها مەهاباد کەمالی خۆفرۆشیشی لێیە،و کارۆ و لوقمانیش لێیە، ها ئەوان دوون و ئەو یەکە، کەواتا هەر شۆرشگێرەکان زۆرترن، رۆژانە بەو دڵی خۆدانەوەیە، کە سەڕمان هەلێنا دوای ٤٥ رۆژ بەپێ رۆیشتن گەیشتینەوە بنکەی حزب... دووجار لەمڕدن رزگارمان ببوو، باشە ئێستا چ بکەین... قەینا قەینا...خۆ دەزانم باوەرمان پێ دەکەن کە ٤٥ رۆژ بەپێ بەشاخ و داخدا رۆیشتووین، باوەرمان پێ دەکەن کە لەبڕسان نەمردووین، و لەسەرمان رەقیش نەبووین، پێشمەرگە رۆژی وای زۆر بینیوە.... بەڵام کاک حەسەن چۆن پێیان بڵێن ئەو دوو کەسە کێن لەگەڵمانن... کەچوین سێ کەس بووین ئێستا پێنج کەسین، خۆ ناتوانین بلێین رێکخستنەکانمانن... چونکە هەر زوو دەفتەرەکان هە'ڵبدەنەوە ئاشکرا دەبن... باشە باوەرمان پێ دەکەن ئەوانە چیان کردووە... جا بۆ باوەر ناکەن... کارۆ و لوقمان نەبان.... دەزانی ئەوانە کێن...ئەوانە فریشتەن... ئەوانە پێشمەرگەن پێشمەرگە... رۆژهەڵات پڕییەتی لەو کەسانە...
سکانسی سێیەم
ساڵ ٢٠١٦-یە، کارۆ قاچێکی لەکار کەوتووە، لەسەر کورسییەک لەناوەراستی حەوشەکەیان دانیشتووە، هێشتا دەنگی مین و خومپارەو بی کی سی رایدەچلەکێنێت، کارۆ بەنیوەگیانی سیلەی چاوی وشک نابێتەوە، ئەی ئازاد و ئەمیر کوان، کارۆ دەلێ خەجاڵەتباری ئەو خاکەم، دەبووا منیش لەگەڵ شەهید ئازاد و شەهید ئەمیربام... ناوەراستی حەوشەکە لەکارۆ بووەتە گۆرەپانی شەڕ، پێشمەرگەو پاسدار لەشەڕێکی قورسدان، کارۆش وەبیری دێتەوە کە خۆی بە بڕینداری کەوتۆتە ناوەراستی ئەوان. لەپڕێکدا کارۆ چاوی بە دەرگای حەوشە دەکەوێت، رادەچلەکێ ئەوە وەستا کامیلە، نا هەو نییە... کارۆ حەپەساوە.... نا هەو نییە، خەیالی شەڕەکە بەری نەدوام... کە گەرمی لێوی وەستا کامیلم لەسەر روومەت و هەناسەی هەنیسکەکانم هەست پێکرد، بەخوا بۆخۆییەتی... یاری باوەفا چۆن وادەبێ لەنۆروێژەوە چۆن وا بەپەلە گەیشتییەوە...

ژیوار رەسوڵی 2016
بگه‌ڕێوه|ده‌سپێک|بینێره‌ بۆ فه‌یس‌بوسکه‌که‌ت
ده‌ستپێک
ڕێبه‌رانی شه‌هید
ئاڵبۆمی نه‌مران
 
کۆمار
بانگه‌واز
په‌یوه‌ندی