avatar

بۆ پیرە هەڵۆی کوردستان (مام رەحمان)


چەندی لەو بەرزە خەیاڵم دەفڕێ
هەرد و پێدەشت و سنووران دەبڕێ
نییە ئۆقرەی لە سەران بۆ تاوێ
دەفڕێ و باڵ دەبزێوێ تا وێ
دێ هەتا شاری حەماسە و جوانی
پێی بدا تین و گوڕێ بە گیانی
ئێرە مەڵبەندی هەڵۆیەو شێران
گوڵی ئەو دەشتە بە خوێنێ دێران
هەر لە کۆن کۆنەوە وای لێ باوە
بەرگی ئازایی بە بەژنی بڕاوە
داری سێدارە و لافاوی خوێن
لێرە نەک خەڵکی نەکرد چاوترسێن
رۆژێ پەروەردە دەکا سەد رۆڵە
دانەنێ خەنجەری خۆی بۆ تۆڵە
چەقەڵی پەهلەوی شاڵاوی نەما
جگە بۆنەعلەتێ هەر ناوی نەما
دەستی لافاوی زەمەن رایماڵی
هاتە جێی گورگی مەلا و بەرماڵی
ئەوەیان فێری درۆ و فتوا بوو
دەستی شەیتانی لە باخەڵ نابوو
رەوە پاسداری بە زێدم وەرکرد
داری خوێنخۆری لک و پۆی دەرکرد
کوڕە کورد راپەڕی لەو دەشت و دەرە
کوڕ مەڵێ شێرە فەرەنجی لەبەرە
سەقزی دڵ بەخەم و خوێناوی
کوڕ و کچ سەر دەخەنە پێناوی
راپەڕین رۆڵە لە گشت گوند و شار
دەرپەڕین جاش و بەجێ ما پاسدار
قارەمان زۆرن و زۆر کۆڵە قەڵەم
خوایە لێم خۆش بە لە تاوان و هەڵەم
باسی ئازایەتیی و جوامێری
دەیکەم و شیرنە گوێ رادێری
لێرە رەحمانێ وەکوو ئاوی ژیان
بوو بە پێشمەرگە لە پێناوی ژیان
قارەمانانە لە مەیدانی خەبات
گیانی دانابوو لە بۆ گەل بەخەڵات
رووی لە هەر لایێ دەکرد خۆر ئاسا
کەمتیار دەردەپەڕی و دەش تاسا
سەری سیخواری لە نێو ئاشی کرد
راوی گورگ و چەقەڵی جاشی کرد
بوو بە سەرمەشقی ژیانی لاوان
دەرسی ئیمان و ئەوینی دا وان

دەنگی پێی تا لە گەورکانەوە هات
ئافەریم رۆڵە لە بورکانەوە هات
سەری دانابوو لە بەر پێی هەڵگورد
تا بپارێزی کوڕ و زێدی کورد
سەری قەندیلی بەتەم بۆی نەوی بوو
گڕەمشقاڵە لە حاندی کەوی بوو
زۆڵە جاش جارێ کە دەیبیست ناوی
دەردەچوو چۆڵی دەکرد جێ راوی
کۆڵەکەی هێز و لک و پەل ئەو بوو
سێبەری رۆژ و شەبەنگی شەو بوو
دەیدڕی تارە شەوی بێدادی
لە دڵیدابوو شنەی ئازادی
قەت نەترساوە لە فیشەک چاوی
لە خەبات شل نەبووە هەنگاوی
ئەوە قەترێکە لە دەریاێی تەمەن
کە بەدڵ نابوویە پێناوی وەتەن
***
هەستە ئەی پیرە قەڵەم رابە بە دڵ
گوێ مەدە سەخڵەت و ئازاری چقڵ
هەمە ئەسپاردەیەک و بۆم بەرە زوو
رێ بە هەورازەوە لێت نەبڕێ پشوو
پیرە شاری سەقزم سەر بە تەمە
چل چەمەش سەر بەهەش و دڵ بەخەمە
کەسەر و داخی دڵی ئاخکەندی
تەپوتۆزێتی لە کەند و لەندی
لێزمە بارانێ لە چاوی هەوران
دیارە خەمبارە لە کۆچی گەوران
خەبەری مەرگی هەڵۆی پێ داون
دار و بەرد لێرە هەموو تاساون
کوێرە رێگاێی لە پێنجوێنەوە دێ
بۆنی پێشمەرگە لە گشت شوێنەوە دێ
پەرەژاڵ سەر بەتەم و مل بە کوێن
پێم دەڵێ پۆلی هەڵۆیان لە کوێن
سیانەزار زاری پڕی هاوارە
خەمی کۆچی تۆ لە چاوی دیارە
بانە بانگ دێڵێ بەرەو باینجان
دەڵێ کوا بۆچی نەهات مام رەحمان
مامە گیان پیری دڵ و داوێن پاک
بنوو ئارام بە لە داوێنی خاک
ئەو کوڕ و کاڵەی بە دووتا هاتن
رێبواری بە ورەی رێگاتن
گشت لەسەر پەند و قسە و وانەی تۆن
هەموو شاگردی قوتابخانەی تۆن

گیان لەسەر دەست بە گوڕ و ئامادەن
تازە رێبازی خەبات بەرنادەن
شار و دێهات وچیا و لێڕ و دەوەن
گشتی سەرخۆشی لە ئاخکەندی دەکەن
پێی ئەتۆی نایە سەری دەریاوێ
بۆتە پادشایێ کە تاجی ناوێ
ئەوە شانازییەکە بۆ گشتمان
چۆڵ نییە سەنگەرەکەی مام رەحمان
تاکوو زیندووین و لەسەر ئەو خاکەین
سەنگەری سووری شەهید چۆڵ ناکەین.

رەسووڵ سوڵتانی 2012.02.27
بگه‌ڕێوه|ده‌سپێک|بینێره‌ بۆ فه‌یس‌بوسکه‌که‌ت
ده‌ستپێک
ڕێبه‌رانی شه‌هید
ئاڵبۆمی نه‌مران
 
کۆمار
بانگه‌واز
په‌یوه‌ندی