avatar

گه‌شتێک به‌ نێو کۆری تێکۆشه‌ران دا


کۆتایی یه‌کانی ساڵی 2007ی زایینی(مانگی دیسامبر) ده‌رفه‌تێک بۆ ئێمه‌ی دووره‌ وڵات هه‌ڵکه‌وت هه‌تا سنووره‌کان ببرین و له‌و په‌ری ئاوه‌کانه‌وه‌ خۆمان بگه‌یه‌نینه‌وه‌ خاکی کوردستانه‌ ره‌نگینه‌که‌مان.هه‌رچه‌ند بیانووی سه‌ره‌کی بۆ گرتنه‌ به‌ری ئه‌و رێگا دوور و درێژه‌ دیداری دایک و باوک و خوشک و براو خزمان بوو که‌ دیاره‌ ئه‌وانیش هه‌ر ده‌بوایه‌ سنووری ده‌ستکرد ببه‌زێنن هه‌تا بتوانن به‌ دیدارمان شاد بن،به‌ڵام له‌ په‌نا ئه‌وه‌ش دا مه‌به‌ستی دیکه‌ خۆیان ‌حه‌شار دابوو که‌ لێره‌ دا زیاتر ئه‌وان دێنه‌ به‌ر باس.
یه‌کێک له‌ سه‌ره‌کیترین مه‌به‌سته‌کانی ئه‌م سه‌فه‌ره‌ دیاره‌ به‌ پێی سروشت سه‌ردانی کوردستانی ئازاد و ئاوه‌دان بوو که‌ ئێستا بۆ هه‌ر کوردێکی نیشته‌ جێی ده‌ره‌وه‌ له‌ پلانه‌ ئه‌سڵی یه‌کانی سه‌فه‌ره‌.ئێمه‌ی بنه‌ماڵه‌ی چوارکه‌سی له‌ راستی دا توانیمان چاومان به‌ به‌شیک له‌ شار و ناوچه‌کانی باشووری کوردستان بکه‌وێ و به‌ دیداری خاکی پاکی وڵاته‌که‌مان شاد بین.له‌و بواره‌ دا به‌ خۆشی یه‌وه‌ کوردستانمان به‌ چاوی گه‌ش دیت و هیوای زۆرمان له‌ دڵ دا دروست بوو که‌ داهاتوویه‌کی روونمان هه‌یه‌.هه‌ڵبه‌ت له‌ ژیانی رۆژانه‌ی خه‌ڵک و یه‌کانی ده‌وله‌ت داریی کوردان دا خاڵی لاوازی زۆر به‌ر چاو ده‌که‌ون که‌ شی کردنه‌وه‌یان له‌ حه‌وسه‌له‌ی ئه‌م نووسراوه‌یه‌ به‌ده‌ره‌،به‌ڵام گرینگ جم و جۆڵ بۆ به‌ره‌و پێش چوونه‌ که‌ ئێمه‌ هه‌ستمان پێ کرد.هیوادارین ئاواتی ئێمه‌ی کورد له‌و راده‌یه‌ دا به‌رته‌سک نه‌کرێته‌وه‌ و وه‌دوای ئاواته‌ به‌رزه‌کانی دیکه‌ش بکه‌وین که‌ خه‌ونی هه‌موومانه‌.
یه‌کێک له‌ مه‌ترسی یه‌کانی نیشته‌جێبوونی کوردان له‌ ده‌ره‌وه‌ی کوردستان،دوورکه‌وتنه‌وه‌ی منداڵه‌کانیان له‌ زمان و داب و نه‌ریتی نه‌ته‌وایه‌تی یانه‌ که‌ ئه‌م کێشه‌یه‌ پێویسته‌ بیری قووڵی لێ بکرێته‌وه‌.هه‌رچه‌ند زۆر بنه‌ماڵه‌ هه‌وڵی جیددی ده‌ده‌ن بۆ ئه‌وه‌ی منداڵه‌کانیان به‌ کوردانه‌ بار بێنن،که‌چی له‌ به‌ر هۆی جۆراوجۆر زۆریان سه‌رکه‌وتنی ته‌واو وه‌ده‌ست ناهێنن.ره‌نگه‌ یه‌ک له‌و رێگایانه‌ که‌ ده‌توانێ یارمه‌تیده‌ری بنه‌ماڵه‌کان بۆ گه‌یشتن به‌ مه‌به‌ستی دڵخواز بێ،سه‌فه‌ری جارو باره‌ی کوردستان به‌ منداڵه‌کانه‌وه‌ بێ.به‌ خۆشی یه‌وه‌ ئێمه‌ توانیمان له‌و سه‌فه‌ره‌ دا به‌ به‌شێک له‌ مه‌به‌سته‌که‌مان بگه‌ین و منداڵه‌کانمان زیاتر ده‌گه‌ل کوردستان و کورد ئاشنا بکه‌ین.
ئێمه‌ که‌ ساڵانێکی زۆر ژیانمان تێکه‌ڵاوی ژیانی خه‌باتکارانی مه‌یدانی کوردایه‌تی بوو،نوێ کردنه‌وه‌ی دیدار و ئاگادار بوون له‌ وه‌زعی ئه‌و تێکۆشه‌رانه‌،له‌ ئاواته‌ گرینگه‌کانمان بوو.به‌ خۆشی یه‌وه‌ له‌و سه‌فه‌ره‌ دا توانیمان له‌ نزیکه‌وه‌ ده‌گه‌ڵ به‌شێکی زۆریان پێوه‌ندی بگرین،چاومان پێیان بکه‌وێ و بیره‌وه‌ری یه‌کان زیندوو که‌ینه‌وه‌.دیداری ئه‌و خۆشه‌ویستانه‌ گور و تینی زیاتری به‌ ئێمه‌ به‌خشی و له‌سه‌ر به‌رده‌وامی له‌ خه‌باتی کوردایه‌تی سوورتری کردین.هه‌رچه‌ند به‌ داخێکی گرانه‌وه‌ له‌ دیداری به‌شێک له‌ هاوسه‌نگه‌رانی پێشوومان بێبه‌ش بووین،به‌ڵام بوونی ئه‌و هه‌موو تێکۆشه‌ره‌ دڵ پر له‌ ئاواته‌ له‌ ده‌وری حیزبی دێمۆکراتی کوردستان و به‌رده‌وام بوونیان له‌ خه‌باتی هه‌مه‌لایه‌نه‌یان دا، جارێکی دیکه‌ هێناینیه‌ سه‌ر ئه‌و باوه‌ره‌ که‌ "هه‌تا کوردێک بمێنێ، واز له‌ خه‌بات ناهێنێ".
ئه‌گه‌ر "قه‌ڵای کۆیه"‌ وه‌ک مۆتۆری وه‌گه‌ر خستنی ریزه‌کانی حیزبی دێمۆکڕاتی کوردستان حیساب بکه‌ین که‌ هه‌ر واشه‌،له‌و سه‌ردانه‌ دا بۆمان ده‌رکه‌وت که‌ ئه‌و مۆتۆره له‌ قابلییه‌ت وتوانایه‌کی زۆر به‌هره‌مه‌نده‌،به‌ مه‌رجێک مه‌یدانی مانۆری هه‌بێ.ئه‌و خه‌لکه‌ زۆره‌ی له‌ ده‌وری حیزب کۆ بوونه‌ته‌وه‌ که‌ دیاره‌ هه‌ر یه‌ک خاوه‌نی ئه‌زموون و لێهاتوویی تایبه‌تن،جیگای هومێدن که‌ به‌ باشترین شێوه‌ی گونجاو توانای خۆیان وه‌گه‌ر بخه‌ن و له‌ هه‌ڵسوورتر کردنی په‌ره‌کانی ئه‌و مۆتۆره‌دا به‌شی زیاتر وه‌ئه‌ستۆ بگرن.مه‌به‌ستی ئه‌م نووسراوه‌ به‌راو‌رد،یان له‌به‌ریه‌ک راگرتنی قه‌واره‌ و رێبه‌رایه‌تیی ئه‌و حیزبه‌ ده‌گه‌ڵ هیچ لایه‌نێکی دیکه‌ نیه‌ و ته‌نانه‌ت تاریف و ته‌مجید له‌ خودی حیزبیش نیه‌.چونکه‌ هه‌ر له‌ جێ دا هه‌م حیزبی دێمۆکرات و هه‌م باقی لایه‌نه‌کانی دیکه‌ش ده‌گه‌ڵ کۆمه‌ڵێک کیشه‌ و ته‌نگ و چه‌ڵه‌مه‌ رووبه‌روون که‌ رێگای پێهه‌ڵا گوتنیان بۆ ناهێڵیته‌وه‌.به‌ڵام به‌هه‌مووی ئه‌وانه‌شه‌وه‌ بینه‌ر کاتێک چاو له‌ راده‌ و تواناکانی سه‌رکردایه‌تی و ده‌ورو به‌ری حیزبی دێمۆکراتی کوردستان ده‌کا ناتوانى راستی یه‌کان نه‌درکێنی.
ئه‌گه‌ر له‌سیما ناسراوه‌کانی بزووتنه‌وه‌ی نه‌ته‌وایه‌تی له‌ رۆژهه‌لاتی کوردستان را ده‌ست پێ بکه‌م و بمه‌وێ ئاماژه‌یه‌ک به‌ ناو و ناوبانگیان بکه‌م،جێگای دڵخۆشی یه‌ که‌ ژماره‌یه‌کی به‌رچاویان له‌ ریزه‌کانی ئه‌و حیزبه‌ دا قه‌راریان گرتوه‌.من له‌سه‌ر ئیزنی ئه‌و به‌رێزانه‌ لێره‌دا به‌ بێ له‌به‌ر چاوگرتنی پێگه‌ی حیزبی و سیاسی و کۆمه‌لایه‌تی یان،ناوی ژماره‌یه‌کیان دێنم و ئه‌گه‌ر له‌به‌ر ژماره‌ی زۆریان و فکری بڵاوم که‌سانێکم له‌ بیر چووبن داوای لێبووردن ده‌که‌م.
تێکۆشه‌ر مامۆستا عه‌بدوڵا حه‌سه‌نزاده‌ که‌سایه‌تیی ئه‌ده‌بی،رووناکبیری و سیاسیی کورد که‌ هیچ پێویستی به‌ ناساندن نیه‌.هیوا دارم ئه‌و زاته‌ به‌ له‌شی ساغ ومێشکی هه‌ڵسوور و ئه‌زموونی بێ سنووری له‌ خه‌باتی شێلگیرانه‌ی دا هه‌روا به‌رده‌وام بێ.
تێکۆشه‌ر جه‌لیل گادانی یادگاری ژ.کاف و کۆماری کوردستان و خه‌باتکاری قه‌ت نه‌سره‌وتووی گه‌له‌که‌مان.کاک جه‌لیل ئێستاش هه‌ڵسوورێکی نه‌سره‌وته‌یه‌ و حیزبی دێمۆکراتی پێ ده‌ناسرێته‌وه‌.کاک جه‌لیل له‌ بواری نووسینیش دا ناوێکی ئاشنایه‌.
تێکۆشه‌ر حه‌سه‌ن ره‌ستگار که‌ زۆربه‌ی ته‌مه‌نی خۆی له‌ رێی کوردایه‌تی دا به‌سه‌ر بردوه‌ و زۆربه‌ش له‌ بریارده‌رانی سه‌ره‌کی بوه‌.کاک حه‌سه‌نی ره‌ستگار و حیزبی دێمۆکرات لێک جیا ناکرێنه‌وه‌.
تێکۆشه‌ر فه‌تاح کاویان به‌ رابوردووی دوور و درێژی کوردایه‌تی و حیزبایه‌تی یه‌وه‌،له‌و نه‌سره‌وتانه‌ی رێگای خه‌باته‌ که‌ کورد شانازیی پێوه‌ ده‌کا.کاک فه‌تاح له‌ نووسین و وه‌رگێرانیش دا ده‌ستێکی باڵای هه‌یه‌ و له‌و بواره‌ش دا حیزب پیی قه‌رزداره‌.
تێکۆشه‌ر حوسه‌ین مه‌ده‌نی که‌سایه‌تیی ناسراوی کورد و خه‌باتکاری له‌ مێژینه‌ی حیزب،له‌ بواری جۆراوجۆر دا ئه‌زموونی هه‌یه‌ و خزمه‌تی به‌رچاوی به‌ بزووتنه‌وه‌ی نه‌ته‌وایه‌تیی کورد کردوه‌، هه‌روه‌ک ئێستاش له‌ ریزه‌کانی حیزب دا به‌رده‌وامه‌.
تێکۆشه‌ر حه‌مه‌ره‌سوول حه‌سه‌نپوور،له‌ کادره‌ چالاکه‌کانی سه‌رده‌می ره‌شی پاشایه‌تی و درێژه‌ ده‌ری به‌وه‌فای رێگای کوردایه‌تی.
تێکۆشه‌ر ئه‌حمه‌د نستانی،یادگاری بزووتنه‌وه‌ سه‌ربه‌رزانه‌که‌ی 46-47و له‌ فه‌رمانده‌رانی هه‌ره‌ دیاری نێو هێزی پێشمه‌رگه‌.
تێکۆشه‌ر مامه‌ قاله‌ی سووتووی ئه‌و کورده‌ رووح سووک و به‌ ئیمانه‌ی مه‌یدانی خه‌باتی کوردایه‌تی،ئێستاش هانده‌ری هاوسه‌نگه‌رانیه‌تی و بوونی له‌ نێو ریزه‌کانی دێمۆکرات دا وره‌به‌خشی لاوانه‌.

تێکۆشه‌ر سه‌دیقی قه‌وی په‌نجه‌ له‌ چالاکانی ده‌ورانی ره‌شی شایه‌تی و درێژه‌ده‌ری به‌رده‌وامی خه‌باتی کوردایه‌تی.کاک سه‌دیق له‌ دۆستانی نزیکی شه‌هید دۆکتور سه‌عید بوو.
تێکۆشه‌ر خاڵه‌ سه‌ید قادر، ئه‌و کورده‌ دڵپاک و وره‌ به‌خشه‌ی قه‌ت ساتێک ناهومێدی رووی تێ نه‌کردوه‌ و بیری له‌ ژیانی ئاسایی نه‌کردۆته‌وه‌.
تێکۆشه‌ر مامۆستا مه‌لا محه‌ممه‌د عوسمانی،که‌سایه‌تیی ئایینی و سیاسیی کورد که‌ چه‌ندین ساڵه‌ له‌ ریزی خه‌باتکارانی مه‌یدانی کوردایه‌تی دایه‌ و ساتێک به‌ له‌ خه‌بات دوور نه‌که‌وتۆته‌وه‌.
پێشمه‌رگه‌ی هه‌میشه‌ ئاماده‌ کاک که‌ریم حه‌سه‌ن،سیمای ناسراوی نێو ریزه‌کانی حیزب و ئۆلگووی نه‌زم و رێک و پێکی.بوونی که‌سانی وه‌ک کاک که‌ریم حه‌سه‌ن له‌ ریزه‌کانی حیزب دا هانده‌ری خۆ ریکخستنن.
جگه‌ له‌ وانه‌، حیزبی دێمۆکراتی کوردستان خاوه‌نی زۆر کۆنه‌ ئه‌ندام و تێکۆشه‌ری دیکه‌یه‌ که‌ هه‌ر ئێستاش به‌ ته‌مه‌نی زۆره‌وه‌ خه‌ریکی درێژه‌ دان به‌ خه‌باتی به‌رده‌وامن و بوونیان له‌ نێو ریزه‌کانی دیمۆکرات دا،وره‌به‌خشی هاورێ یانه‌.له‌وانه‌ ناوی ئه‌م خۆشه‌ویستانه‌م له‌ بیره‌:
سه‌رهه‌نگ ره‌شید،مام برایم په‌یره‌وان،مام برایم بێژوێیی،مام عه‌لی کونه‌مشکه‌یی؛مام خدر ئه‌لیاسی،مام مراد بێشاسپی،کاک حه‌مه‌گوران،مام عه‌لی مه‌ڵاله‌ری،کاک محه‌ممه‌دی خوداپه‌نا و گه‌لێک مام و خال و کاکی به‌رێزی دیکه‌ که‌ هه‌ر یه‌ک به‌شیکی گرینگ له‌ ته‌مه‌نی خۆیان سه‌رفی خزمه‌ت به‌ ئامانجه‌ به‌رزه‌کانی نه‌ته‌وه‌که‌یان کردوه‌.
له‌ نێو کۆری خه‌باتکارانی دێمۆکرات دا یادگاره‌کانی هه‌ردوو رێبه‌ری شه‌هید ،دۆکتۆر قاسملوو و دۆکتۆر شه‌ره‌فکه‌ندی ده‌بیندرێن که‌ زه‌مانێک به‌ دڵ و گیان پارێزگاری یان لێده‌کردن و ده‌بوونه‌هۆی به‌ دڵنیایی ژیانی ئه‌وان.له‌ ریزی ئه‌و خۆشه‌ویستانه‌ دا چاوم به‌ به‌رێزان :که‌ریم عه‌لیپوور،مسته‌فای حه‌کیمزاده‌،حوسه‌ین حاجی،که‌ریم شه‌ڵماشی و ره‌سووڵ مووساپوور که‌وت و به‌ وانیشه‌وه‌ رێز و خۆشه‌ویستی زیاتری رێبه‌رانی شه‌هیدم له‌ لا زیندوو بۆوه‌.
چاوم به‌ تێکۆشه‌ری ماندوویی نه‌ناس محه‌ممه‌دی حه‌سه‌ن پوور که‌وت که‌ هه‌ر وه‌ک چۆن یاری تێرادیوی دۆکتۆر قاسملووی نه‌مر بوو و له‌ ئه‌رکه‌کانی رۆژانه‌ی دا یاریده‌ی ده‌دا،ئێستاش هه‌ر وا ماندوویی نه‌ناسانه‌ له‌ ده‌وری به‌رێز مامۆستایه‌ و هه‌روا جێگای بروا و متمانه‌یه‌.
له‌ نێو سیما ناسراوه‌کانی خه‌باتی چه‌کداری و له‌ فه‌رمانده‌رانی به‌وه‌جی هێزی پێشمه‌رگه‌ش که‌ دڵی دۆژمنیان وه‌له‌رزین ده‌خست و ئێستاش هه‌روا سه‌ربه‌رزانه‌ ئوبووهه‌تی خۆیان راگرتوه‌،توانیم تێکۆشه‌رانی وه‌ک: که‌ریم سه‌قزی،برایم چووکه‌ڵی، فه‌تاحی ئێلخانیزاده،عوسمان ئه‌فشین،هه‌مزه‌ سارکه‌یی،ساڵه‌ جوانرۆیی،فه‌تاح عه‌بدوڵا پوور،خالید وه‌نه‌وشه‌،عوسمان مه‌میل،خدر میراوه‌یی،محه‌ممه‌د مام ئاغایی و ژماره‌یه‌کی دیکه‌ له‌و خه‌باتکارانه ‌‌ببینم و به‌وانیشه‌وه‌ تین و گورێک به‌خۆم بده‌م.هه‌ڵبه‌ت جێگای کاک ئه‌حمه‌د نستانی له‌ ریزی ئه‌و فه‌رمانده‌ به‌وه‌جانه‌ش دا دیاره‌.
ئه‌وانه‌ی له‌ 3 ده‌یه‌ی رابردوو دا ده‌وری دیار و ئاشکرایان له‌ رێکخستن،وه‌گه‌رخستن،به‌ره‌وپێشه‌وه‌بردن،سیاسه‌تگوزاری و به‌ گشتی هه‌ڵسووراندنی کار و چالاکی یه‌کانی حیزبی دێمۆکراتی کوردستان دا هه‌بوه‌ و ئێستاس هه‌یانه‌،مایه‌ی هیوا و هومێدن.له‌ نێو ئه‌و ماندوویی نه‌ناسانه‌ دا جگه‌ له‌ چه‌ند به‌رێزێکی که‌ پێشتر ناویانم هێنان،چاوم به‌ زۆری دیکه‌شیان که‌وت وبه‌وه‌ش ده‌رسی زیاتر فیر بووم.با هه‌روه‌ک نموونه‌ باسی ئه‌م تێکۆشه‌رانه‌ بکه‌م که‌ خۆم له‌ نزیکه‌وه‌ ده‌یان ناسم.له‌وانه‌ هاورێیان:مسته‌فا مه‌ولوودی،حه‌سه‌ن قادرزاده‌،عومه‌ر باڵه‌کی،سمایل بازیار،قادر وریا،خه‌جیجه‌ مه‌عزوور،کویستان فتووحی،نه‌سرین حه‌داد،گه‌لاوێژ حه‌سه‌ن زاده‌، موعته‌سه‌م نوورانی،محه‌ممه‌د که‌سرایی،مسته‌فا مه‌عرووفی ،محه‌ممه‌د شه‌هره‌وان،سه‌ید برایم که‌ریمی،سه‌ید عه‌بدوللا حوسه‌ینی،که‌ماڵی که‌ریمی،مامۆستا بێبه‌ش،ئه‌حمه‌د قادری، برایم زێوه‌یی،حه‌سه‌ن ئه‌برووزه‌نی، عوسمان عه‌بباسی،مه‌ولوود عه‌زیزی،مامۆستا جه‌عفه‌ره‌کان، حسن خۆشکه‌لام ،حه‌سه‌نی کویخا سمایلى ، ره‌حمان مه‌حموودی، کاوه‌ په‌یره‌وان،حسن میرى ،علیشا، خدر به‌گ ، سیامک وه‌کیلى ، عمر شاداب ، ئه‌حمه‌د سادق پوور، حه‌مه‌ده‌مین شه‌ریفى، ئه‌بووبه‌کر ئیسماعیلى، محه‌ممه‌د گولپه‌سه‌ندى ،غه‌فوور سۆفی و چه‌ندان که‌سایه‌تیی دیاری مه‌یدانی خه‌بات.
هه‌ر له‌ نێو ئه‌و تێکۆشه‌رانه‌ دا که‌ به‌شیکی زۆر له‌ ته‌مه‌ن و ئیمکاناتی خۆیان سه‌رفی خزمه‌ت به‌ ئامانجه‌کانی کورد کردوه‌،ژماره‌یه‌کیان قۆڵی هیممه‌تیان هه‌ڵماڵیوه‌ و خه‌ریکی درێژه‌ دان به‌ خوێندن له‌ زانستگاکانی هه‌رێمی کوردستانن.له‌وانه‌ چاوم به‌م به‌رێزانه‌ که‌وت:سمایل بازیار خوێندکاری ماسته‌ر له‌ مێژوو،موعته‌سه‌م نوورانی ماسته‌ر له‌ زمانی ئینگلیسی،قادر وریا ماسته‌ر له‌ ئه‌ده‌بی کورد،مسته‌فا مه‌عرووفی ماسته‌ر له‌ ئه‌ده‌بی کورد،حه‌سه‌ن قادرزاده‌ ماسته‌ر،عومه‌ر باڵه‌کی محه‌ممه‌د که‌سرایی،خه‌دیجه‌ مه‌غزوور، عه‌بدوڵا حوسه‌ینی،عیسمه‌ت نستانی،ئه‌وانه‌ هه‌مووی ساڵی چواری قانوون ده‌خوێنن.کاک مسته‌فا مه‌ولوودی و خوشکه‌ سه‌کینه‌ حوسه‌ینی ساڵی سێی زانستگان له‌ به‌شی قانوون.
له‌ نێو ئه‌وانه‌ دا که‌ یان به‌ درێژایی ته‌مه‌نی رادیۆ ده‌نگی کوردستان ده‌گه‌ڵی بوون،یان ساڵانێکی زۆر خزمه‌تیان تیدا کردوه‌،خۆشه‌ویستانی وه‌ک؛مه‌نسوور خوسره‌وی،سیامه‌ک قه‌وی په‌نجه،سوهه‌یلا قادری،ئه‌حمه‌د قادری،مامۆستا بێبه‌ش،محی الدین،شیرزاد و ژماره‌یه‌کی دیکه‌ش که‌ هه‌موویان سه‌مبولی خۆراگری و کاری به‌رده‌وامن.دیاره‌ به‌داخه‌وه‌ خه‌جیجه‌ خانی مه‌عزوور که‌ ساڵانێکی زۆر ده‌نگی زوڵاڵی میوانی هه‌موو ماڵێکی کورد بوو ئێستا له‌ رادیۆ دووره‌ و سه‌ر قالی خزمه‌تی دیکه‌یه‌.
قاره‌مانانی خۆ رزگار کردوو له‌ سیاچاڵه‌کانی کۆماری ئیسلامیم چاو پێکه‌وتن که‌ پێشتر داستانی رزگار بوونیانم بیستبوو.ئه‌وانه‌ بریتی بوون له‌؛کامیل ئوستاد ئه‌حمه‌دی،حه‌سه‌ن جه‌زایری و مه‌جید سه‌ده‌فی.کارۆی فیداکاریشم دیت که‌ وه‌سیله‌ی رزگاری ئه‌وانی پێک هێنا و به‌و چه‌شنه‌ داستانێکی نه‌مری تۆمار کرد.هه‌روه‌ها چاوم به‌ دیداری زیندانیی ناسراوی دێمۆکرات،کاک محه‌ممه‌د شاروێرانی گه‌شایه‌وه‌ که‌ ئه‌ویش دوای ئازارێکی یه‌کجار زۆر له‌ به‌ندی کۆماری ئیسلامی خۆی رزگار کرد.
له‌ نیو ریزه‌کانی دێمۆکرات دا زۆرن ئه‌وانه‌ی خاوه‌ن به‌هره‌ی هونه‌رین،جا ج شاعیر،نووسه‌ر،ده‌نگ خۆش،شانۆکار،فیلم هه‌ڵگر،وێنه‌ هه‌ڵگر یان نیگار کێش و خه‌ت خۆش و په‌یکه‌ر ساز.له‌و سه‌فه‌ره‌م دا چێژم له‌ دانیشتن ده‌گه‌ڵ به‌رێزان:مامۆستا بێبه‌ش،قادر وریا،ئه‌حمه‌د قادری،ره‌سوول سوڵتانی،سوهه‌یلا قادری،حه‌لیمه‌ ره‌سووڵی،ره‌سووڵ گه‌وهه‌ری،مه‌نسوور ده‌روێشزاده‌ و زۆری دیکه‌ش وه‌رگرت.
له‌ هه‌مووی ئه‌وانه‌ بگوزه‌رێین،دیتنی ئه‌و ده‌یان کادره‌ هه‌ڵسوور و پێگه‌یوه‌ی نێو ریزه‌کانی دێمۆکرات که‌ پێشتر زۆریانم نه‌ده‌ناسین و ناوی به‌شێکیانم بیستبوو،به‌راستی تووشی سه‌رسورمانی کردم.رووم له‌ هه‌ر کوێ یه‌ک ده‌کرد، چاوم به‌ ژماره‌یه‌ک لاوی زانستگا دیتووی بیرمه‌ندی خاوه‌ن به‌هره‌ ده‌که‌وت و کاتێک ده‌گه‌ڵیان ده‌که‌وتمه‌ گفتوگۆ، بۆم روون ده‌بۆوه‌ حیزبی دێمۆکرات خاوه‌نی چ سه‌رمایه‌ یه‌کی به‌نرخه‌.مامۆستا هێمن سه‌یدی به‌و هه‌موو زانیاری و ئه‌زموونه‌وه‌،کاک رامبۆد لوتفپوورى کوری خاوه‌ن به‌رنامه‌،ره‌سووڵی سوڵتانی لاوی هه‌ست ناسک و خاوه‌ن به‌هره‌ ،کاک عه‌بدوڵای به‌هرامی،خاتوو حه‌لیمه‌ ره‌سووڵی،کاک ره‌حمان سه‌لیمی،سمایلى شه‌ره‌فی،عه‌لی بداغی،ئازاد شێخی،فایق مه‌حموودی،مه‌نسوور سه‌ممار،سامان فه‌قێ نه‌بی و ده‌یانی دیکه‌ که‌ به‌داخه‌وه‌ ناتوانم ناوی هه‌موویان بێنم و دیاره‌ هه‌ر کام له‌ به‌شێک دا سه‌ررشته‌یان هه‌یه‌.له‌ راستیدا ده‌کرێ بڵێم به‌ بوونی ئه‌و هه‌موو ئینسانه‌ به‌هره‌مه‌ند و شاره‌زایه‌ که‌له‌ پێکهێنه‌رانی مۆتۆری هه‌ڵسووراندنی حیزب به‌ حیساب دێن هیوای ئه‌وه‌ هه‌یه‌ که‌ برینی ده‌ستی دووله‌ت بوون سارێژ بیته‌وه‌ و حیزبی خۆشه‌ویستی خه‌ڵکی کوردستان که‌ند و کۆسپه‌کانی سه‌ر ریگای ته‌خت بکا.
نه‌مان ده‌توانی هه‌ستی خۆشحالیی خۆمان ده‌رنه‌برین کاتێک سه‌دان لاوی چوست و چالاک و خوێنده‌واری کوردمان له‌ ریزه‌کانی پێشمه‌رگه‌ دا ده‌دیتن که‌ چۆن خه‌ریکی خۆ پێگه‌یاندنن.ئه‌وانه‌ رێگایه‌کیان گرتوه‌ته‌ به‌ر که‌ رێگای خزمه‌ت به‌ ئامانجی کورده‌ و هه‌ر بۆیه‌ خۆشه‌ویستی خه‌ڵکن.له‌ به‌ر ئه‌وه‌ هه‌م ژماره‌ی پێشمه‌رگه‌کان یه‌کجار زۆر بوو هه‌م کاتی ئه‌وه‌مان نه‌بوو ناسیاوییان ده‌گه‌ڵ په‌یدا بکه‌ین، به‌ پێشکه‌ش کردنی چه‌پکه‌ گوڵی خۆشه‌ویستی و داوای سه‌رکه‌وتن بۆیان،واز دێنم.
زۆرن ئه‌وانه‌ی له‌ ریزه‌کانی حیزبی دێمۆکرات دا گیانیان فیدا کردوه‌ و بوونه‌ته‌ مایه‌ی خه‌می هاوسه‌نگه‌رانیان.به‌ شانازیه‌وه‌ سه‌ردانی بنه‌ماڵه‌ی چه‌ند شه‌هیدی دیمۆکراتمان کرد و تاوێک ده‌گه‌ڵ بنه‌ماڵه‌ به‌رێزه‌کانیان خه‌می ئه‌و له‌ده‌ست چوونانه‌مان به‌ش کرد.له‌وانه‌:به‌رێز بنه‌ماڵه‌ی شه‌هیدان سه‌لام عه‌زیزی، عوسمان ره‌حیمی،ئه‌بووبه‌کر ئیسماعیلزاده‌(ساماڵ)و مام عه‌وڵا.
هه‌ر چه‌ند به‌داخه‌وه‌ نه‌مان توانی ده‌گه‌ڵ ئه‌و هه‌موو ئه‌ندام و لایه‌نگره‌ دڵسۆزه‌ی حیزب که‌ له‌ شاره‌کانی باشووری کوردستان خه‌ریکی خوێندن یان کار کردنن،ته‌ماس بگرین و له‌ نزیکه‌وه‌ بیان بینین،به‌ڵام بیستنی هه‌واڵی کار و تێکۆشانیان و هه‌ڵبژاردنی ژماره‌ی زۆری نوێنه‌رانیان بۆ کۆنگره به‌ جاریک دڵخۆشی کردین.هه‌ڵبه‌ت له‌ نێو ئه‌و خۆشه‌ویستانه‌ دا چاوم به‌ دوو تیکۆشه‌ر که‌وت که‌ هه‌ردووکیان هه‌تا بڵێی به‌ به‌هره و توانان.کاک مه‌نسوور ده‌روێش زاده‌،ته‌نز نووس و شانۆ نووسی ناسراو.کاکه‌ ره‌سووڵ گه‌وهه‌ری لاوی خاوه‌ن چه‌ندین هونه‌ر.به‌ راستی بوونی که‌سانی وه‌ک ئه‌م دوو به‌رێزه‌ له‌ ده‌وری حیزبی دێمۆکرات،جیگای دڵخۆشی یه‌.‌کاتێک ده‌گه‌ڵ ئه‌و ده‌ریای ئینسانه‌ به‌ره‌وروو ده‌بووم و هێزی به‌ربڵاوی کار و تێکۆشانم چاو پێ ده‌که‌وت،ئه‌و پرسیاره‌ به‌ربینگی پێ ده‌گرتم:داخوا مه‌به‌ست له‌ ده‌سته‌ واژه‌ی "تاقمێکی چه‌ند که‌سی" چیه‌ که‌ به‌ر گوێ ده‌گه‌یشت؟
هه‌ر چه‌ند ده‌زانم بۆ وه‌گه‌ر خستنی مۆتۆری کار و تێکۆشانی حیزب ته‌نیا ژماره‌ و توانای ئینسانه‌کان به‌س نیه‌،به‌ڵام بوونی هێزێکی ئاوا به‌رچاو ئه‌ویش به‌و پوتانسیه‌له‌وه‌،ده‌توانێ یاریده‌ده‌ری سه‌ره‌کی بێ.رێکخستن و له‌ جێی خۆ دانانی ئه‌و هه‌موو به‌هره‌یه‌ هه‌رچه‌ند ئاسان نیه‌ به‌ڵام پێویسته‌.دیسان ده‌یڵێمه‌وه‌،حیزبی دێمۆکراتی کوردستان وه‌ک لایه‌نه‌ سیاسی یه‌کانی دیکه‌ی رۆژهه‌ڵاتی کوردستان،ده‌گه‌ڵ گیروگرفتی جۆراوجۆر ده‌ست به‌یه‌خه‌یه‌ و ره‌نگه‌ به‌شێک له‌ گیر و گرفته‌کانی به‌م زوانه‌ چاره‌سه‌ر نه‌بن،به‌ڵام ده‌توانم شاهیدی بده‌م ئه‌م حیزبه‌ له‌ زه‌رفییه‌تێکی زۆر بۆ له‌ نێو بردنی که‌م و کووری یه‌ کانی به‌هره‌مه‌نده‌.چونکه‌:
1-رێبه‌رایه‌تی یه‌کی خاوه‌ن ئه‌زموون و شاره‌زا به‌ سیاسه‌تی هه‌یه‌.
2-له‌ به‌ده‌نه‌یه‌کی ئاگا و پێگه‌یشتوو به‌هره‌مه‌نده‌ که‌ ده‌توانێ رێگای دروست بدۆزێته‌وه‌.
3-خاوه‌ن رابوردوویه‌کی دوور و درێژی پر له‌ سه‌روه‌ری یه‌.
4-ئاگای له‌ که‌م و کووری یه‌کانی هه‌یه‌ و بریاری خۆ ساغ کردنه‌وه‌ی داوه‌.
5-ده‌گه‌ڵ خه‌ڵک سەرراسته‌ و راستی یه‌کانیان لێ ناشارێته‌وه.
6-هێزێکی زۆری ئینسانیی له‌ ده‌وره‌یە.
به‌ هه‌مووی ئه‌وانه‌شه‌وه‌،ئیقرار ده‌که‌م جارێ ده‌گه‌ڵ چاوه‌روانی یه‌کانی ئه‌ندام و لایه‌نگرانی خۆی له‌ پێوه‌ندی ده‌گه‌ڵ نوێ بوونه‌وه‌ دا مه‌ودای زۆری هه‌یه‌.هۆ،یان هۆیه‌کانی ئه‌و مه‌ودا زۆره‌ چین مه‌به‌ستی ئه‌م نووسینه‌ نیه‌.هیوادارم زیاتر قۆڵی هیممه‌تی لێ هه‌ڵماڵن و کارێک که‌ ده‌ستی پێ کراوه‌ ته‌واوی که‌ن.له‌و پێوه‌ندی یه‌دا با چاوه‌روانی کۆنگره‌ بین.
سڵاو له‌ هه‌موو تێکۆشه‌رانی رێگای ئازادیی کوردستان.
هه‌یاس کاردۆ2008.02.16
بگه‌ڕێوه|ده‌سپێک|بینێره‌ بۆ فه‌یس‌بوسکه‌که‌ت
ده‌ستپێک
ڕێبه‌رانی شه‌هید
ئاڵبۆمی نه‌مران
 
کۆمار
بانگه‌واز
په‌یوه‌ندی