avatar

وتووێژ له‌گه‌ڵ‌ زیندانیی‌ سیاسی‌، هاوڕێ‌ محه‌ممه‌د شاروێرانی‌


‌له‌ گه‌لاوێژی‌ ساڵی‌ 1996دا هاوڕێ‌ محه‌ممه‌د شاروێرانی‌، کادری‌ ته‌شکیلاتیی‌ حیزب له‌ ناوچه‌ی‌ مه‌هاباد، له‌ کاتی‌ جێبه‌جێکردنی‌ ئه‌رکی‌ حیزبی‌دا، له‌لایه‌ن هێزێکی‌ سه‌ر به‌ ده‌زگای‌ جاسووسیی‌ کۆماری‌ ئیسلامی‌یه‌وه‌ گه‌مارۆ درا‌و به‌ برینداری‌ که‌وته‌ ده‌ستیان.
ئه‌م هاوڕێ‌یه‌مان هه‌ر له‌ یه‌که‌م ساته‌کانی‌ گیرانی‌یه‌وه‌، له‌ کاتێک‌دا به‌ توندی‌ بریندار ببوو، له‌گه‌ڵ‌ ئازار‌و فشارێکی‌ زۆر به‌ره‌وڕوو کرا بۆ ئه‌وه‌ی‌ له‌ ئاکامی‌ فشار‌و هه‌ڕه‌شه‌‌و وه‌زعی‌ شپرزه‌ی‌ جیسمی‌دا، ناچار بێ‌ هاوکاریی‌ ده‌زگای‌ سه‌رکوت‌و ئیتلاعات‌و جاسووسیی‌ رێژیمدا بکا‌و کادره‌کانی‌ دیکه‌ی‌ حیزب له‌ ناوچه‌ی‌ مه‌هاباد بخاته‌ داوی‌ رێژیم‌و ئه‌ندامانی‌ چالاکی‌ حیزبی‌ دێموکراتی کوردستان به‌و ده‌زگایه‌ بناسێنێ‌. داستانی‌ به‌ربه‌ره‌کانێی‌ ئه‌و رۆڵه‌ خه‌باتگێڕ‌و دێموکراته‌ له‌گه‌ڵ‌ مه‌رگ‌و له‌گه‌ڵ‌ هه‌ڕه‌شه‌‌و ئه‌شکه‌نجه‌ی‌ بازجووه‌کان‌و کاربه‌ده‌ستانی‌ ده‌زگای‌ سه‌رکوت‌و جاسووسی‌دا، له‌ مێژه‌ زار به‌زار له‌ نێو خه‌ڵکی‌ کوردستان‌دا بڵاو بۆته‌وه‌. کاک محه‌ممه‌د شاروێرانی‌ کۆتایی‌یه‌کانی‌ زستانی‌ ساڵی‌ رابردوو، له‌ ده‌رفه‌تێک که‌ڵکی‌ وه‌رگرت‌و به‌ بنه‌ماڵه‌وه‌ خۆی‌ گه‌یانده‌وه‌ نێو تێکۆشه‌رانی‌ حیزبی‌ دێموکراتی کوردستان. ئه‌م وتووێژه‌ی‌ لێره‌دا ده‌یخوێننه‌وه‌، به‌دوای‌ گه‌ڕانه‌وه‌ی‌ سه‌ربه‌رزانه‌ی‌ ئه‌و هاوڕێیه‌مان بۆ نێو هاوسه‌نگه‌رانی‌دا، له‌گه‌ڵی‌ ئه‌نجام دراوه‌.
پ: هاوڕێی‌ به‌ڕێز کاک محه‌ممه‌د! پێشه‌کی‌ پێمان خۆشه‌ سه‌باره‌ت به‌ چۆنیه‌تیی‌ ده‌سگیرکرانی‌ خۆت بۆمان بدوێی‌؟
و: ئیزن بده‌ن پێشه‌کی‌ جوانترین سڵاو بنێرم بۆ بنه‌ماڵه‌ی‌ به‌ڕێزی‌ شه‌هیدان، کادر‌و پێشمه‌رگه‌کانی‌ حیزبی‌ دێموکراتی کوردستان ، ئه‌ندامان‌و لایه‌نگرانی‌ حیزبه‌ خۆشه‌ویسته‌که‌مان‌و زیندانییانی‌ سیاسی‌‌و به‌گشتی‌ هه‌موو خه‌ڵکی‌ کوردستان.
ئێمه‌ تیمێکی‌ ته‌شکیلاتیی‌ کۆمیته‌ی‌ شارستانی‌ مه‌هاباد له‌ ساڵی‌ 1996 بۆ مه‌ئموورییه‌تی‌ حیزبی‌ چووینه‌ ناوچه‌ی‌ شاروێران، دوای‌ ماوه‌ی‌ نزیک به‌ دوو مانگ مانه‌وه‌ له‌و ناوچه‌یه‌دا رۆژی‌ 4/8/1996 مه‌ئموورییه‌تێک بۆ ئێمه‌ هاته‌ پێش. من به‌ ته‌نیا ئه‌و مه‌ئموورییه‌ته‌م وه‌ئه‌ستۆ گرت، هه‌ر به‌و بۆنه‌یه‌وه‌ سه‌عات 12ی‌ نیوه‌ڕۆی‌ ئه‌و رۆژه‌ رووم له‌ ئاوایی‌ "قه‌ره‌خان" کرد بۆ ئه‌وه‌ی‌ ئه‌و شوێنه‌ی‌ بۆم دیاری‌ کرابوو بچمه‌ ئه‌وێ‌، ماوه‌ی‌ بیست ده‌قیقه‌ به‌سه‌ر چوو، ویستم له‌و ماڵه‌ی‌ که‌ لێی‌ بووم بڕۆم، به‌ڵام ئه‌و که‌سانه‌ی‌ ده‌مهه‌ویست له‌گه‌ڵیان بچمه‌ ئه‌و جێگایه‌ له‌ ماڵ‌ نه‌بوون، کاتێک هه‌ستام، به‌داخه‌وه‌ دیتم چه‌ند نه‌فه‌ر له‌ پاسدارانی‌ کۆماری‌ ئیسلامی‌ ده‌وری‌ ئه‌و ماڵه‌یان گرتوه‌. منیش خۆم ئاماده‌ کرد بۆ ئه‌وه‌ی‌ بتوانم تازه‌ که‌ ده‌وری‌ ماڵه‌که‌یان گرتوه‌ ئیمکانی‌ نه‌جاتبوون نیه‌، گوتم وا چاکه‌ لانیکه‌م ده‌ست بکه‌مه‌وه‌. بۆ ئه‌نجامی‌ ئه‌و کاره‌ خۆم ئاماده‌ کرد، به‌ڵام به‌ داخه‌وه‌ ئه‌و چه‌که‌ی‌ که‌ پێم بوو به‌ چه‌ند هۆ که‌ پێویست ناکا لێره‌دا باسی‌ بکه‌م، ده‌ری‌ نه‌کرد، دوای‌ ئه‌وه‌ی‌ زانیم ده‌مانچه‌که‌م ده‌ری‌ ناکا، هاتمه‌ حه‌ساری‌ ئه‌و ماڵه‌‌و ویستم به‌هه‌ر شێوه‌یه‌ک خۆم رزگار که‌م، به‌ داخه‌وه‌ ئه‌وانه‌ی‌ له‌ حه‌سار راوه‌ستابوون ته‌قه‌یان لـێ‌کردم‌و به‌ برینداری‌ وه‌عه‌رزی‌ که‌وتم. هه‌ر که‌ وه‌عه‌رزی‌ که‌وتم بێهۆش بووم، زۆر پیس لاقم بریندار ببوو، کاتێک هاتنه‌ سه‌رم ده‌یانویست ئاخرین گولله‌م لـێ‌ بده‌ن. ره‌فیقی‌ ئه‌و پاسداره‌ی‌ ته‌قه‌ی‌ لـێ‌کردم پێی‌ گوت ئاخرین گولله‌ی‌ لـێ‌ده‌م؟ ئه‌ویش گوتی‌ نا، ئه‌وه‌ "محه‌ممه‌د شاروێرانی‌"یه‌ کارمان پێیه‌تی‌، ئه‌وه‌ کادری‌ حیزبی‌یه‌، ئیقراری‌ لـێ‌ وه‌رده‌گرین‌و دواتر ئێعدامی‌ ده‌که‌ین. کاتێک وه‌هۆش هاتمه‌وه‌ وتیان هه‌سته‌ با وه‌ڕێ‌ که‌وین، ئه‌منیش وتم ناتوانم. بن پیلیان گرتم. له‌وێ‌ زانیم وه‌زعم زۆر خراپه‌، لاقم زۆر پیس بریندار بوو. بۆخۆیان به‌ راکێش راکێش‌کردن بردمیان ده‌ ماشێنه‌که‌یان هاویشتم. ئه‌وان (که‌ وه‌سه‌ریه‌ک که‌وتنه‌وه‌) بوون به‌ پێنج نه‌فه‌ر، یانی‌ پێنج نه‌فه‌ر هاتبوونه‌ ئه‌و ماڵه‌. ئه‌و ماڵه‌ی‌ که‌ ئه‌من تێی‌دا بووم به‌ ته‌نیا هه‌ڵ‌که‌وتبوو، نه‌مزانی‌ ته‌نیا ئه‌و پێنج نه‌فه‌ره‌ن، ئه‌من ئیحساسم کرد که‌ جه‌ماعه‌تێکی‌ یه‌کجار زۆر هاتوون بۆ ئه‌و کاره‌. له‌ رێگادا سواری‌ ماشێنی‌ دیکه‌یان کردم. باخه‌ڵیان گه‌ڕام سێ‌ هه‌زار تمه‌نی‌ تێ‌دا بوو ده‌گه‌ڵ‌ سه‌عاته‌که‌م، هه‌ر له‌وێ‌ ئه‌ویان ده‌رهێنا‌و دایان به‌و که‌سه‌ی‌ که‌ ره‌گباره‌که‌ی‌ هاویشتبوو‌و برینداری‌ کردبووم. له‌ رێگادا بێسیمیان بۆ سوپا کرد له‌ مه‌هاباد، هێزێکی‌ یه‌کجار زۆر هات، چۆن ئه‌وان ده‌یانزانی‌ من هه‌ر به‌ ته‌نێ‌ نیم جه‌ماعه‌تی‌ دیکه‌شم له‌گه‌ڵه‌، له‌ رێگای‌ ئه‌و شنووده‌ی‌ که‌ بۆخۆیان دایان‌نابوو، ئه‌و بێسیمانه‌ی‌ ئێمه‌ هه‌مووی‌ کۆنترۆڵ‌ کرابوو، بێ‌ ئه‌وه‌ی‌ ئێمه‌ بزانین. به‌هه‌رحاڵ‌، هاتن منیان له‌گه‌ڵ‌ خۆیان برد بۆ شوێنێک نه‌مده‌زانی‌ بنکه‌ی‌ سوپای‌ پاسداران بوو یا پادگان. بردیانم بۆ ئه‌وێ‌ له‌سه‌ر سه‌نده‌ڵی‌ دایان‌‌نام، هه‌ر قسه‌یان لـێ‌ ده‌پرسیم، منیش وه‌زعێکی‌ یه‌کجار زۆر خراپم هه‌بوو، خوێنڕێژی‌یه‌کی‌ زۆر کردبوو، له‌سه‌ر سه‌نده‌ڵی‌یه‌که‌ دایان‌نابووم، به‌لای‌ ئه‌و لاقه‌م‌دا که‌ بریندار ببوو، وه‌عه‌رزی‌ که‌وتبووم‌و بێهۆش بووم، کاتێک وه‌هۆش هاتمه‌وه‌ به‌ پێ‌ له‌ سه‌ریان ده‌دام، ده‌یانگوت هه‌سته‌ جێگای‌ ئه‌و کادرانه‌ی‌ دیکه‌ یا ئه‌و ره‌فێقانه‌ی‌ دیکه‌ت ده‌بێ‌ پێمان نیشان ده‌ی‌، منیش هه‌ر پێم گوتن که‌سم له‌گه‌ڵ‌ نه‌بووه‌، به‌ڵام ئه‌وه‌ بۆ ئه‌وان قابلی‌ قه‌بووڵ‌ نه‌بوو، چونکه‌ ئه‌وان ده‌یانزانی‌، هه‌موو شتێکیان ده‌زانی‌ که‌ ده‌چم بۆ کوێ‌، ده‌مهه‌وێ‌ بچمه‌ لای‌ چ که‌سانێک یا شه‌وێ‌ چ که‌سانێکم له‌گه‌ڵ‌ بووه‌. نێوی‌ هه‌موو ئه‌و کادرانه‌یان ده‌هێنا که‌ له‌گه‌ڵ‌ من بوون یا ده‌مهه‌ویست بچم بۆ لایان. به‌هه‌ر حاڵ‌، خۆم راگرت، به‌ خۆشی‌یه‌وه‌ ئه‌و ویست‌و داخوازی‌یه‌ی‌ که‌ ئه‌وان ده‌یانویست پێی‌ نه‌گه‌یشتن. پاشان بردیانم بۆ بیمارستان‌و ده‌ستیان له‌ پشته‌وه‌ڕا به‌ستم، به‌و حاڵه‌ش لاقم هه‌ر خوێنی‌ لـێ‌ ده‌هات‌و بێهۆش بووم، بردیانم له‌سه‌ر ته‌ختی‌ بیمارستان رایان‌کێشام. هێزێکی‌ یه‌کجار زۆر هات ده‌وری‌ بیمارستانیان دا، ئه‌وانه‌ی‌ به‌رپرسی‌ بیمارستان بوون، دوکتوره‌کان به‌وه‌ زۆر ناڕه‌حه‌ت بوون که‌ ئه‌و هه‌موو هێزه‌یان هێناوه‌ بۆ ده‌وری‌ بیمارستان. هه‌ر که‌ له‌سه‌ر ته‌ختی‌ بیمارستان رایان‌کێشام که‌ چاره‌سه‌رم که‌ن، به‌ڵام که‌ له‌ پشته‌وه‌ ده‌ستیان به‌ستبووم، نه‌یانکرده‌وه‌. ئه‌و دوکتورانه‌ش هاتنه‌ بن سه‌رم گوتیان کاکه‌ گیان ئه‌وه‌ ده‌ستت ناکه‌نه‌وه‌، که‌وایه‌ به‌و شێوه‌یه‌ بمری‌ زۆر باشتره‌.
دوکتوره‌که‌، به‌و پاسدارانه‌ی‌ که‌ له‌لای‌ سه‌رم یا له‌لای‌ لاقم راوه‌ستابوون، گوتی‌ ده‌بێ‌ ده‌ستی‌ بکه‌نه‌وه‌ ده‌نا به‌و شێوه‌یه‌ چاره‌سه‌ر ناکرێ‌، ئه‌وه‌ لاقی‌ ورد بووه‌. ئه‌وانیش وتیان نا ئه‌وه‌ بۆ ئه‌وه‌ نابێ‌ ده‌ستی‌ بکه‌یه‌وه‌، ئه‌وانیش وتیان ئێمه‌ به‌و شێوه‌یه‌ ناتوانین چاره‌سه‌ری‌ بکه‌ین، بیبه‌ن، لای‌ به‌رن. هه‌ر ئه‌و رۆژه‌ منیان لابرد، بردمیانه‌ دیوێکی‌ دیکه‌ دووباره‌ هێنایانم بۆ سوپای‌ پاسداران. زۆریان قسه‌ له‌گه‌ڵ‌ کردم، زۆریان قه‌ول‌و قه‌رار پێ‌دام که‌ ئه‌گه‌ر قه‌رار بێ‌ ئه‌من جێگای‌ ئه‌و کادرانه‌ی‌ دیکه‌ که‌ له‌سه‌ر یه‌ک ده‌بوونه‌ هه‌شت نه‌فه‌ر له‌ کادره‌کانی‌ ئێمه‌ به‌ کاک عومه‌ر باڵه‌کی‌یه‌وه‌ که‌ ئه‌ندامی‌ کومیته‌ی‌ ناوه‌ندی‌ بوو، باسی‌ کاک عومه‌ریان ده‌کرد هه‌میشه‌، زۆر له‌وی‌ داغدار بوون. باسی‌ ئه‌ویان ده‌کرد‌و ده‌یانگوت ئه‌گه‌ر جێگای‌ کاک عومه‌ر باڵه‌کی‌ یا هاوڕێکانی‌تر به‌ ئێمه‌ نیشان بده‌ی‌ قه‌ولت پێ‌ ده‌ده‌ین ئێستا نامه‌ ده‌نووسین‌و حه‌تمه‌ن ئێمه‌ ته‌خفیف بۆ تۆ قاییل ده‌بین‌و له‌و مه‌رگه‌ی‌ یا له‌ حوکمه‌ی‌ که‌ تۆ هه‌ته‌ ئیرفاقت بۆ قایل ده‌بین.
پ: کاک محه‌ممه‌د! زیاتر سه‌باره‌ت به‌ شێوه‌ی‌ ئه‌شکه‌نجه‌کردن یا به‌گشتی‌ بڵێم ره‌فتاری‌ ئه‌و مه‌ئموورانه‌ی‌ رێژیم له‌ سه‌ره‌تای‌ گرتنت‌دا یا له‌ رۆژه‌کانی‌ یه‌که‌م‌دا بۆمان بدوێ‌؟
و: ئه‌وه‌ی‌ راستی‌ بێ‌ له‌ منیان نه‌دا، به‌ڵام به‌ شێوه‌یه‌کی‌ زۆر سه‌خت بریندار ببووم، ئه‌وه‌ بۆ من ئه‌شکه‌نجه‌یه‌کی‌ زۆر گه‌وره‌ بوو له‌باری‌ روحی‌‌و ره‌وانی‌یه‌وه‌ فشارێکی‌ یه‌کجار زۆریان بۆ من هێنا. کاتێک له‌ بیمارستان دوکتوره‌کان موعاله‌جه‌یان نه‌کردم هێنایانمه‌وه‌‌و فشارێکی‌ زۆریان بۆ هێنام، گوتیان حه‌تمه‌ن ده‌بێ‌ جێگا‌و رێگای‌ هاوڕێکانت نیشانمان بده‌ی‌. منیش بۆ ئه‌وه‌ی‌ له‌ کۆڵم بنه‌وه‌، گوتم ئه‌من شه‌و له‌وان جیا بوومه‌ته‌وه‌، له‌ حاڵێک‌دا ده‌یانزانی‌ واش نه‌بووه‌، به‌ڵام قه‌ولم پێ‌دان‌و گوتم بمبه‌ن بۆ ئه‌و جێگایه‌ ئه‌وه‌ له‌ شاخن، له‌ شاخه‌ ڕه‌ش. شاخه‌ ره‌ش هه‌یه‌ له‌ شاروێران، گوتم له‌وێ‌ به‌جێم هێشتوون، شه‌وێ‌ له‌ سه‌دا سه‌د له‌وێنه‌. هه‌ر بۆوه‌ی‌ له‌ کۆڵم ببنه‌وه‌، چونکه‌ وه‌زعێکی‌ یه‌کجار خراپم هه‌بوو. گوتی‌ باشه‌ ساز ده‌بین، ده‌بێ‌ به‌ بیسیمه‌که‌ت ئه‌تۆش قسه‌یان له‌گه‌ڵ‌ بکه‌ی‌. به‌ڵام کاتێک زانیم ئه‌وه‌ هه‌ر فشارم بۆ دێنن، گوتم باشه‌. له‌ رێگادا بیسیمه‌که‌یان وه‌ من دا. ئه‌من ده‌ستم له‌ بیسیمه‌که‌ دا‌و کاناڵه‌کانم تێکه‌ڵ‌ کردن. بیست ماشێن ده‌بوون، هه‌ر به‌و وه‌زعه‌ی‌ که‌ هه‌مبوو بێهۆش ده‌بووم‌و وه‌هۆش ده‌هاتمه‌وه‌. به‌ لۆکه‌ لێویان ته‌ڕ ده‌کردم‌و ئاویان له‌ زاری‌ ده‌کردم. هێندێک له‌و که‌سانه‌ی‌ له‌گه‌ڵ‌ من دانیشتبوون ـ له‌ پاسداره‌کان ـ ده‌یانگوت ئاوی‌ ده‌نێ‌ با نه‌مرێ‌ باشتره‌. جا نازانم نییه‌تی‌ باشیان بوو یا خراپ. به‌ڵام به‌هه‌ر حاڵ‌ نه‌مردم، به‌و وه‌زعه‌ خراپه‌ی‌ که‌ هه‌مبوو، بردیانین، چووین بۆ شاخ. له‌گه‌ڵ‌ ئه‌و هاوڕێیانه‌م رۆژێک پێشتر قه‌رارمان دانابوو سه‌عات حه‌وتی‌ ئێوارێ‌ ئێمه‌ بێینه‌ سه‌ر خه‌ت، بچم ئه‌وان بگرمه‌وه‌، ده‌مزانی‌ هه‌ر دێن، نه‌شیانزانیبوو که‌ من ئه‌و وه‌زعه‌م به‌سه‌ر هاتوه‌. به‌ڵام ده‌سته‌که‌ی‌ دیکه‌ نا، ئه‌وانه‌ی‌ که‌ له‌ کنیان‌ڕا هاتم. چووین بۆ سه‌ر شاخ. له‌وێ‌ دڵنیا بووم، زۆر له‌ باری‌ رۆحی‌یه‌وه‌ رازی‌ بووم له‌وه‌ی‌ که‌ خۆم راگرتوه‌ تا سه‌عات حه‌وت که‌ تاریک داهات، له‌وه‌ی‌ که‌ توانیومه‌ جێگای‌ هاوڕێیانی‌ خۆشه‌ویستم به‌ دژی‌ گه‌لی‌یه‌کان نه‌ڵێم. سه‌عات حه‌وت ئه‌و هاوڕێیانه‌ هاتنه‌ سه‌ر خه‌ت، به‌ڵام بیسیمه‌که‌ی‌ ئه‌وان (هی‌ ئیتلاعاتی‌یه‌کان) که‌ شنوودی‌ پێ‌ ده‌ڵێن، هه‌ر وه‌ری‌ ده‌گرت، یانی‌ قسه‌کانی‌ ئه‌وانی‌ وه‌رده‌گرت‌و به‌ڕێی‌ نه‌ده‌کرد. گوێم لـێ‌بوو ئه‌وانی‌ دیکه‌ له‌ ناوچه‌ی‌ شاروێران ئه‌و جێگایه‌ی‌ که‌ من لێیان جیا بوومه‌وه‌ ته‌قریبه‌ن کیلۆمیترێک دوور ده‌بوو له‌و جێگایه‌ی‌ که‌ من لێی‌ بریندار بووم له‌ "قه‌ره‌خانی‌"، ئه‌وان له‌وبه‌ری‌ چۆمی‌ بوون، له‌وێ‌ جوابیان دانه‌وه‌ گوتیان وه‌ڵڵا شاروێرانی‌ شه‌هید بووه‌. ئه‌وان وایان زانیبوو شه‌هید بووم، کاتێک ئه‌وه‌یان گوێ‌ لـێ‌بوو، ئه‌و پاسدارانه‌ له‌وێ‌ زۆریان ئه‌زییه‌ت کردم، گوتیان تازه‌ شه‌و داهاتوه‌، تۆ له‌ خۆڕا ئه‌و درۆیه‌ت له‌گه‌ڵ‌ ئێمه‌ کردوه‌، ئێمه‌ت هێناوه‌ بۆ ئێره‌، ئێستا ئه‌وانه‌ له‌ کوێن جواب ده‌ده‌نه‌وه‌. له‌ کوێ‌ قسه‌ له‌گه‌ڵ‌ یه‌ک ده‌که‌ن، ئه‌منیش گوتم نازانم ئه‌وه‌ ره‌نگه‌ لێره‌ بوونه‌، حه‌تمه‌ن کاتێک زانیویانه‌ ئه‌من بریندار بووم، جێگه‌که‌یان گۆڕیوه‌. به‌هه‌ر حاڵ‌، شه‌و داهات، به‌ خۆشی‌یه‌وه‌ منیش له‌باری‌ رۆحی‌یه‌وه‌ هه‌رچه‌ند له‌ سه‌ختترین شه‌رایه‌ت‌دا بووم، به‌ڵام له‌و باره‌وه‌ خۆشحاڵ‌ بووم له‌وه‌ی‌ که‌ توانیومه‌ خۆم رابگرم‌و هاوڕێیانی‌ خۆشه‌ویستم نه‌که‌ونه‌ داوی‌ دوژمنان. کاتێک زانییان هیچیان ده‌ست نه‌که‌وتوه‌، منیان هێناوه‌ بۆ سوپای‌ پاسداران. هه‌ر ئه‌و شه‌وه‌ که‌ هێنایانمه‌وه‌ بۆ سوپا، ده‌وریان دام، له‌ دیوێک‌دا رایان‌گرتبووم، وه‌زعێکی‌ زۆر خراپم هه‌بوو، خوێنی‌ لاقم هه‌ر ده‌هات، ته‌نانه‌ت ئه‌ویشیان ئیشک نه‌کردبوو، بێ‌ئه‌وه‌ی‌ حه‌بێکم ده‌نێ‌ یا ده‌رزی‌یه‌کم لـێ‌ده‌ن. به‌هه‌ر حاڵ‌، ده‌ردێکی‌ یه‌کجار زۆرم هه‌بوو، رایان‌کێشابووم. پاشان فه‌رمانده‌ی‌ سوپا له‌وه‌ که‌ هیچیان وه‌ده‌ست نه‌که‌وتبوو زۆر تووڕه‌ بوو. ده‌یگوت ئه‌وه‌ ئێمه‌ یه‌کساڵه‌ له‌ فکری‌ ئه‌وه‌ داین که‌ ئێوه‌ له‌ داو خه‌ین، به‌ڵام ئه‌تۆ ئه‌وانه‌ت هه‌موو نه‌جات دان. ئێستا هه‌موو ئه‌و تاوانانه‌ی‌ ئه‌وان یان ئه‌و حوکمه‌ی‌ ئه‌وان هه‌یانبوو، هه‌مووی‌ ده‌خه‌ینه‌ ئه‌ستۆی‌ تۆ، ئه‌تۆ ئه‌وانت نه‌جات داوه‌. دوو سێ‌یه‌ک له‌وێ‌ بوون که‌ پێشتر ده‌مناسین. ناومبیستبوون. هێندێکی‌ دیکه‌شی‌ لـێ‌بوون، هه‌ستان به‌و وه‌زعه‌ی‌ که‌ هه‌مبوو، بڕێکیان ئه‌زییه‌ت کردم، به‌ڵام یه‌کیان له‌وێ‌ وه‌جواب هات گوتی‌ ئه‌زییه‌تی‌ مه‌که‌ن، بۆخۆی‌ ئه‌زییه‌ت دراوه‌، له‌وه‌ زیاتر چی‌ لـێ‌ده‌که‌ن؟ خۆبه‌خۆ به‌ یه‌کتریان ده‌گوت ئه‌گه‌ر ئێمه‌ش باین، جێگای‌ یه‌کترمان نه‌ده‌گوت، خۆ ئه‌وه‌ حه‌قی‌ خۆیه‌تی‌، چونکه‌ ئه‌و کادری‌ حیزبی‌یه‌‌و هاوڕێی‌ خۆی‌ بووین ئه‌وه‌ گه‌وره‌ترین ئیفتیخاری‌ کردوه‌ بۆ خۆی‌. ئه‌وه‌ بۆخۆیان ئه‌و قسه‌یان ده‌کرد خۆبه‌خۆ.
به‌ڵام له‌ پێوه‌ندی‌ له‌گه‌ڵ‌ ئه‌شکه‌نجه‌دا، گه‌وره‌ترین ئه‌شکه‌نجه‌ بۆ من ئه‌وه‌ بوو که‌ ئه‌و چه‌که‌ی‌ که‌ پێم بوو ده‌ری‌ نه‌کرد که‌ بتوانم دیفاعێک له‌ خۆم بکه‌م. باوه‌ڕ که‌ ئینسان وه‌کوو ئه‌وه‌یه‌ که‌ له‌ ئاسمانه‌وه‌ به‌ر بێته‌وه‌، یه‌کده‌فعه‌ ده‌که‌ویه‌ ده‌ستی‌ ئه‌و جینایه‌تکارانه‌، دووهه‌میش ئه‌وه‌ که‌ ئه‌من زۆر به‌ سه‌ختی‌ بریندار بووم، ئه‌وان حه‌تتا نه‌یان‌ده‌هێشت ئێستراحه‌تیش بکه‌م.
پ: کاک محه‌ممه‌د! هه‌ر له‌و شوێنه‌ی‌ که‌ رایان‌گرتبووی‌، هه‌ر له‌وێ‌ راگیرای‌ بۆ ماوه‌یه‌کی‌ دوور‌ودرێژ یا رایانگواستی‌ بۆ جێ‌یه‌کی‌ دیکه‌؟
و: نه‌خێر، ئه‌من وا بزانم هه‌تا سه‌عاتی‌ دوازده‌‌و نیوی‌ نیوه‌رۆیه‌ بوو هه‌ر له‌وێ‌ له‌ سوپا یان پادگان بووم. دیاره‌ باش نازانم کوێ‌ بوو، چونکه‌ راکشابووم، نه‌مزانی‌ کوێ‌ بوو، به‌ڵام دوای‌ سه‌عات دوازده‌‌ونیو وه‌ڕێ‌که‌وتین‌و سێ‌ ماشینیان له‌گه‌ڵ‌ ناردم، چووین بۆ ورمێ‌، بیمارستانی‌ عارفان هه‌یه‌ که‌ بیمارستانێکی‌ سوپایی‌ یا ده‌وڵه‌تی‌یه‌، له‌وێش ئه‌و رۆژه‌ی‌ که‌ چووین دوکتور له‌ ماڵ‌ نه‌بوو. ئێواره‌ هه‌تا سه‌عات یه‌کی‌ شه‌و،‌و وابزانم زه‌نگیان لـێ‌دابوو که‌ بێ‌ نه‌خۆشێکمان هه‌یه‌. سه‌عات یه‌ک‌و نیو بوو ئه‌و دوکتوره‌ هات‌و منداڵێکی‌ 10 ساڵانه‌شی‌ له‌گه‌ڵ‌ بوو، له‌سه‌ر ته‌ختی‌ که‌ راکشابووم سێ‌ چوار نه‌فه‌ریشم له‌گه‌ڵ‌ بوو له‌و دیوه‌، هێندێکیان کوردیشیان ده‌زانی‌، یه‌ک دوویه‌کیان له‌ جاشه‌کان بوون له‌وێیان دانابوون بۆ وه‌ی‌ که‌ ئه‌گه‌ر قه‌راره‌ شتێک بێ‌، ئه‌وه‌ حاڵی‌ ده‌بێ‌ لێیان یا ئه‌گه‌ر که‌سێک بیهه‌وێ‌ بێ‌ بۆ لام. له‌وێ‌ دوکتور وه‌ژوور که‌وت، گوتی‌ ئه‌وه‌ چیه‌؟ ئه‌وانیش گوتیان ئه‌وه‌ کادرێکی‌ حیزبی‌یه‌ گرتوومانه‌. ئه‌و دوکتوره‌ به‌وپه‌ڕی‌ نائینسانی‌یه‌وه‌ له‌ جواب‌دا گوتی‌: که‌سافه‌تێکی‌ ئه‌وا بۆ نایکوژن، ئه‌من وام زانیوه‌ یه‌کێک له‌ برایانی‌ سوپای‌ ئێمه‌یه‌ بریندار بووه‌، بۆیه‌ به‌و شه‌وه‌ هاتووم، ده‌نا ئه‌من بۆ ئینسانی‌ ئه‌وا چۆن دیم؟ چۆن ئێوه‌ مزاحێمی‌ من بوونه‌؟ ئه‌میش له‌ جواب‌دا گوتی‌ ئاخر ئه‌تۆ دوکتوری‌، له‌باری‌ ئینسانی‌یه‌وه‌ ده‌بێ‌ ئه‌تۆ ئنسانییه‌تی‌ خۆت نیشان بده‌ی‌. بۆ تۆ چ فه‌رق ده‌کا نه‌خۆش یا بریندار هه‌ر ئینسانێک بێ‌. ئه‌ویش گوتی‌ ئێستاش هه‌ر زمانت سالم نیه‌ که‌سافه‌ت ئه‌وه‌ به‌ من جێبه‌جێ‌ ناکرێ‌. ئه‌وان پێیان وابوو ئێمه‌ که‌ کوردین یا ئه‌وه‌ی‌ که‌ پێشمه‌رگه‌ی‌ حیزبین هه‌ر ده‌بێ‌ بمرین. له‌ باتی‌ چاره‌سه‌ری‌، ئه‌و قسانه‌ی‌ به‌ من گوت، به‌ جێگای‌ ئه‌وه‌ که‌ دڵخۆشیم بداته‌وه‌‌و بڵێ‌ چ نیه‌ چاره‌سه‌ری‌ لاقت ده‌که‌م، به‌ڵام به‌وپه‌ڕی‌ نائینسانی‌یه‌وه‌ ئه‌و بێ‌حورمه‌تی‌یه‌ی‌ پێ‌کردم.
پ: کاک محه‌ممه‌د! ئه‌و دوکتوره‌ وادیاره‌ به‌جێی‌ ئه‌وه‌ که‌ ئه‌رکی‌ خۆی‌ به‌جێ‌ بێنێ‌ وه‌کوو دوکتورێک، به‌داخه‌وه‌ بێ‌حورمه‌تیشی‌ پێ‌کردووی‌. ئایا هیچ هه‌وڵێکیان بۆ چاره‌سه‌رکردنی‌ برینه‌که‌تدا له‌و بیمارستانه‌ له‌لایه‌ن ئه‌و دوکتوره‌ یان دوکتورێکی‌ دیکه‌وه‌؟
و: نه‌خێر کاتێک ئه‌و دوکتوره‌ ئه‌و قسانه‌ی‌ پێ‌ گوتم به‌داخه‌وه‌ بۆ به‌یانی‌ نه‌ک چاره‌سه‌ری‌ نه‌کردم به‌ڵکوو ته‌نانه‌ت خوێنی‌ لاقیشی‌ قه‌تع نه‌کردم که‌ خوێنڕێژی‌یه‌کی‌ یه‌کجار زۆرم کردبوو. بۆ به‌یانی‌ منیان برد بۆ پادگانێک به‌ هه‌موو ده‌رد‌و ئازارێک که‌ هه‌مبوو به‌و هه‌موو فشاره‌ روحی‌‌و ره‌وانی‌یه‌ی‌ که‌ له‌سه‌ر من بوو، ماوه‌ی‌ چل رۆژ له‌ پادگانێکی‌، که‌ پادگانی‌ "الحمدی‌" پێ‌ده‌ڵێن له‌ قه‌راخ ده‌ریای‌ ورمێ‌یه‌، پادگانی‌ سوپا له‌وێ‌ له‌ دیوێکی‌ رایانگرتبووم وه‌زعێکی‌ یه‌کجار خراپم هه‌بوو، زۆر هاوڕێی‌ دیکه‌ش دیتبوویانم، زۆر خه‌ڵک له‌ زیندانییانی‌ دیکه‌ش دیتوویانم چ وه‌زعێکم هه‌بووه‌ به‌ چ وه‌زعێک که‌وتبوومه‌ ده‌ست کورد کوژان، ئینسان هه‌ر ده‌بێ‌ ئه‌وه‌ بڵێ‌ کورد کوژان، چونکه‌ فه‌رقێکی‌ یه‌کجار زۆر له‌ نێوان کورد‌و غه‌یره‌ زمانه‌کانی‌ دیکه‌ داده‌نێن، ماوه‌ی‌ چل رۆژان من له‌و پادگانه‌ بووم بێ‌ ئه‌وه‌ی‌ هیچ چاره‌سه‌رم بکه‌ن، بێ‌ ئه‌وه‌ی‌ ده‌رزی‌یه‌کم لـێ‌بده‌ن. له‌ ماوه‌ی‌ ئه‌و چل رۆژه‌ی‌دا هه‌مووی‌ له‌ ژێر بازجوویی‌ دابووم‌و هه‌موو ئه‌وه‌ڵی‌ قسه‌که‌یان ئه‌وه‌ بوو که‌ ئه‌تۆ ئێمه‌ت فریودا. ئه‌و هه‌موو زه‌حمه‌ته‌مان کێشاوه‌ ئه‌و چه‌ند کادره‌ت له‌ ده‌ست ئێمه‌ داوه‌ که‌ ئێمه‌ ده‌مانتوانی‌ ئه‌وان بگرین یان بیانکوژین، زۆر ناڕه‌حه‌ت بوون له‌وه‌ی‌ که‌ به‌و مه‌به‌سته‌ی‌ خۆیان نه‌گه‌یشتبوون. دوای‌ ئه‌و چل رۆژه‌، رۆژێک هێنایانمه‌ ئیداره‌ی‌ ئیتلاعاتی‌ ورمێ‌ یه‌کشه‌و له‌وێش رایانگرتم به‌ڵام له‌وێش زۆر ئه‌زیه‌تیان دام به‌ تایبه‌ت ئه‌و کورده‌ خۆفرۆشانه‌ی‌ له‌وێ‌ بوون زۆریان ئه‌زیه‌ت کردم. کاتێک هێنایانمه‌ ئیتلاعات له‌وێ‌ ماتۆرێکی‌ گه‌وره‌یان هه‌ڵ‌کردبوو چونکه‌ له‌ ماوه‌ی‌ ئه‌و چل رۆژه‌دا به‌ هیچ ئاکامێک نه‌گه‌یشتبون وایانده‌زانی‌ ئیداره‌ی‌ ئیتلاعاته‌ حه‌تمه‌ن ده‌توانن به‌ مه‌به‌ستی‌ خۆیان بگه‌ن، له‌وێ‌ ماتۆرێکی‌ یه‌کجار زۆر گه‌وره‌، نازانم چ بوو، به‌رق بوو چی‌ بوو، هه‌ڵیان کردبوو دروست ئه‌و ماشێنه‌ی‌ که‌ منی‌ تێدا بووم به‌و وه‌زعه‌ی‌ که‌ هه‌مبوو ئه‌و هه‌موو خوێنه‌ی‌ که‌ له‌به‌رم رۆیشتبوو، خوێنم له‌ به‌ده‌ندا نه‌مابوو، باوه‌ڕکه‌ زۆر که‌س که‌ ده‌یدیتم بێزی‌ هه‌ڵ‌ده‌ستا بۆخۆشم بێزم له‌ خۆم ده‌کرد. له‌ ماوه‌ی‌ چل رۆژدا نه‌توانی‌ سه‌رت بشۆی‌ یا حه‌مامێک بکه‌ی‌.
پ: کاک محه‌ممه‌د! ئاماژه‌ت به‌وه‌ کرد که‌ جه‌نابت به‌و حاڵه‌وه‌ چل تا چل‌و پێنج شه‌و له‌ پادگان ماویه‌ته‌وه‌ له‌ جیاتی‌ ئه‌وه‌ی‌ له‌ بیمارستانێک له‌ شوێنێک له‌ ژێر نه‌زه‌ری‌ دوکتۆرێک دابی‌! جا پێمان خۆشه‌ بزانین له‌و ماوه‌یه‌دا له‌ چ حاڵه‌تێکی‌ جیسمی‌‌و روحی‌دا بووی‌؟
و: به‌ڵێ‌ له‌و جێگایه‌ی‌ ئه‌منی‌ لـێ‌بووم سێ‌ چوار نه‌فه‌ریان بۆ دانابووم وه‌کوو نیگابان، هه‌موو جارێ‌ ئه‌و بازجوویانه‌ش که‌ ده‌هاتن بۆ ئه‌وه‌ی‌ فشارم بۆ بێنن یا بۆ ئه‌وه‌ی‌ له‌وه‌ زیاتر ناره‌حه‌تم که‌ن هه‌موو جارێ‌ ئیشاره‌یان به‌وه‌ ده‌کرد که‌ شه‌هید کاک "هه‌مزه‌ بێهنام" ئه‌ویش جه‌نازه‌که‌ی‌ له‌وێ‌ بوو، هه‌موو جارێ‌ ده‌یانگوت ئه‌وه‌تا جه‌نازه‌ی‌ هه‌مزه‌ بێهنامیش ئه‌وه‌ لێره‌یه‌. یا یادگاری‌ ئه‌و هاوڕێیانه‌ی‌ حیزبی‌ که‌ ئێعدام کراون وه‌ک مه‌لا ئه‌حمه‌د‌و چه‌ند که‌سێکی‌ دیکه‌ هه‌موو له‌وێ‌ ناوه‌کانیان نووسرابوو. هه‌موو جارێ‌ ئیشاره‌یان به‌وانه‌ ده‌کرد که‌ ئه‌تۆش رۆژێک دادێ‌ به‌و شێوه‌یه‌ یادگاری‌ خۆت ده‌بێ‌ بنووسی‌‌و ئێعدام ده‌کرێی‌. هه‌موو ئه‌و فشاره‌ روحی‌‌و ره‌وانی‌یه‌ بۆ ئه‌وه‌ بوو که‌ به‌ مه‌به‌ستی‌ خۆیان بگه‌ن. به‌داخه‌وه‌ کاتێک ئه‌منیان بردبوو بۆ ورمێ‌ جمهووریی‌ ئیسلامی‌ له‌ ناوچه‌ی‌ شاروێران‌و مه‌هاباد هه‌ر دێ‌یه‌ی‌ سێ‌ چوار نه‌فه‌ری‌ لـێ‌گرتبوون، بۆ ئه‌وه‌ی‌ هه‌م له‌تمه‌ له‌ حیزبه‌که‌مان بدا‌و هه‌م له‌ شه‌خسی‌ خۆم. چه‌ند نه‌فه‌رێکی‌ گرتبوو به‌ڵام به‌ بێ‌ هیچ به‌ڵگه‌یه‌ک چونکه‌ ئه‌وان ئێعترافیان له‌سه‌ر نه‌کرابوو، کاتێک دوای‌ ئه‌و چل رۆژه‌ی‌ که‌ هاتمه‌وه‌ به‌خۆشی‌یه‌وه‌ هه‌موو ئازاد کران، هێندێکیان ده‌هێنانه‌وه‌‌و ده‌هاتنه‌ لاشم له‌لای‌ بازجووه‌کان بێ‌ترس پێم ده‌گوتن ئه‌وانه‌تان له‌ هیچ‌و خۆڕایی‌ گرتوه‌ کاتێک ئه‌و قسانه‌یان ده‌بیست فه‌وره‌ن ئه‌وانه‌یان ئازاد ده‌کرد ئێستا ئه‌و دۆستانه‌ هه‌موو شایه‌دی‌ ئه‌و قه‌زیه‌ن.
پ: کاک محه‌ممه‌د! چۆن بوو ئه‌و دوکتورانه‌ بڕیاریان دا که‌ لاقت ببڕنه‌وه‌؟
و: به‌ڵێ‌ به‌ هۆی‌ ئه‌وه‌ له‌ سه‌ره‌تاوه‌ چاره‌سه‌ریان نه‌کرد دوای‌ ئه‌وه‌ی‌ که‌ هێنایانمه‌ ئیداره‌ی‌ ئیتلاعاتی‌ ورمێ‌ شه‌وێک له‌وێ‌ بووم دوای‌ ئه‌و چل رۆژه‌ی‌، ئه‌و شه‌وه‌ له‌وێ‌ مامه‌وه‌ بۆ به‌یانیش ئه‌وانه‌ی‌ ئیداره‌ی‌ ئیتلاعاتی‌ مه‌هاباد هاتن‌و منیان هێنایه‌وه‌ بۆ ئیداره‌ی‌ ئیتلاعاتی‌ مه‌هاباد. له‌وێ‌ پێیان گوتم، ئه‌گه‌ر قه‌رار بێ‌ ئێمه‌ ئه‌تۆ موعالیجه‌ بکه‌ین به‌ بنه‌ماڵه‌که‌ت بڵێ‌ که‌ بێنه‌وه‌ ـ چونکه‌ بنه‌کاڵه‌که‌م ئه‌و کات له‌ نێو حیزبی‌ دیموکراتدا بوون ـ ئه‌منیش نامه‌یه‌کم بۆ نووسین‌و له‌و نامه‌یه‌دا پێم گوتبوون ئه‌من به‌و وه‌زعه‌که‌وتوومه‌ته‌ ده‌ست جمهووریی‌ ئیسلامی‌ ئه‌تۆش مه‌یلی‌ خۆته‌، بۆخۆت بڕیار بده‌ ئه‌گه‌ر پێت خۆشه‌ ده‌نا هه‌ر له‌وێ‌ به‌. دوای‌ ماوه‌یه‌کی‌ ئه‌وان هاتنه‌وه‌‌و منیشیان برد بۆ عه‌مه‌ل. کاتێک چووین بۆ لای‌ دوکتۆر هه‌ر له‌ سه‌ره‌تا پێی‌ گوتم ئه‌تۆ لاقت رزیوه‌ به‌ هۆی‌ ئه‌وه‌ که‌ چاره‌سه‌ر نه‌کراوه‌، هه‌وه‌ڵێ‌ هات پلاتینی‌ ده‌لاقم کرد‌و ئه‌ویش هه‌موو خه‌رجی‌ خۆمان به‌ڵام دوای‌ ماوه‌یه‌ک ته‌قریبه‌ن دوای‌ مانگێک لاقم رزی‌، دووباره‌ بردیانمه‌وه‌ لای‌ ئه‌و دوکتوره‌ (دوکتور ئاراسته‌ی‌ پـێ‌ده‌ڵێن)، ئه‌ویش گوتی‌ ده‌بێ‌ لاقت ببڕینه‌وه‌ لاقت چاره‌سه‌ر ناکرێ‌. لاقمی‌ بڕیه‌وه‌ ته‌قریبه‌ن له‌ په‌نجه‌مڕا به‌ڵام هه‌ر که‌ بڕیه‌وه‌ وه‌هۆش هاتمه‌وه‌، هات بۆلام گوتی‌ وه‌ڵڵا گوێزینگیشت کار ناکا ئه‌وێش رزیوه‌ که‌وابوو ده‌بێ‌ له‌سه‌ره‌وه‌ی‌ گوێزینگت ڕا لاقت ببڕینه‌وه‌، ئه‌منیش گوتم یه‌کجاری‌ جا بۆ هه‌ر له‌سه‌ره‌وه‌ی‌ گوێزینگم ڕا بڕیباته‌وه‌. گوتی‌ من وایان پێ‌ نه‌گوتووم، چۆنیان پێ‌گوتوومه‌ ئاوام عه‌مه‌ل کردوه‌ یانی‌ له‌ هه‌فته‌یه‌ک دا دوو جار لاقی‌ منی‌ بڕیه‌وه‌. به‌ڵام به‌داخه‌وه‌ دوای‌ ئه‌وه‌ی‌ که‌ بڕاوه‌ته‌وه‌ش ئێستاش ئه‌و ده‌رده‌ هه‌ر ده‌چێژم. چونکه‌ له‌ هه‌وه‌ڵه‌وه‌ چاره‌سه‌ر نه‌کرا یانی‌ جمهووریی‌ ئیسلامی‌ ده‌ردێکی‌ دامه‌وتێ‌ وابزانم هه‌تا مردن له‌گه‌ڵم ده‌بێ‌. وه‌ک بیستبووم ـ دیاره‌ به‌خۆمیان نه‌گوتبوو ـ به‌ڵام وابزانم ئه‌وه‌ بۆ دوو جار ئه‌و لاقه‌ی‌ منیان بڕیوه‌ته‌وه‌ ئه‌وه‌ش هه‌ر شێوه‌یه‌ک بوو له‌ فشاری‌ روحی‌‌و ره‌وانی‌ بۆ من ئه‌ویش ئازار‌و ئه‌زیه‌تێک بوو بۆ من، هه‌م بۆ من هه‌م بۆ بنه‌ماڵه‌که‌م ده‌نا هه‌ر له‌ هه‌وه‌ڵه‌وه‌ ده‌یانتوانی‌ چاره‌سه‌ری‌ بکه‌ن. ته‌نانه‌ت دووجار دوای‌ ئه‌و لاق برێنه‌وه‌شم ئه‌وه‌ هه‌موو دۆستانی‌ نێو حیزب ئاگادارن که‌ من له‌ ده‌ردی‌ لاقم هه‌میشه‌ به‌ شه‌و‌و رۆژ ده‌مناڵاند هه‌تا ئێستا دوای‌ هه‌شت ساڵان دوای‌ وه‌ی‌ دووجاریان بریوه‌ته‌وه‌ به‌ڵام وای‌ چاره‌سه‌ر نه‌کردوه‌ که‌ ژان نه‌کا. ئێستاش که‌ هاتوومه‌ته‌وه‌ نێو حیزبی‌ دیموکرات دووباره‌ عه‌مه‌لم کردۆته‌وه‌ چونکه‌ ئه‌وه‌ڵ‌ جار به‌ شێوه‌یه‌کی‌ دروست‌و ئوسوولی‌ چاره‌سه‌ریان نه‌کردوه‌، ئێستاش به‌داخه‌وه‌ ئه‌و لاقه‌ی‌ من ئه‌و ده‌رده‌ی‌ هه‌ر له‌گه‌ڵه‌‌و وه‌زعم یه‌کجار زۆر خراپه‌.
پ: پێمان خۆش بوو بزانین که‌ شێوه‌ی‌ دادگایی‌ کردنی‌ جه‌نابت چۆن بوو؟ حوکمه‌که‌ی‌ به‌ کوێ‌ گه‌یشت؟
و: باوه‌ڕکه‌ هاوڕێی‌ خۆشه‌ویست، کاتێک باسی‌ دادگایی‌ کردن ده‌کرێ‌ له‌ کۆماری‌ ئیسلامی‌دا ئه‌من هه‌ر پێکه‌نینم دێ‌، چونکه‌ ئه‌من بۆخۆم دیتوومه‌. ئه‌منیان زۆر بردوه‌ بۆ دادگا، ئه‌ویش پێش ئه‌وه‌ی‌ بمبه‌ن باسیان له‌گه‌ڵ‌ کردم که‌ ده‌بێ‌ وه‌کیل بگری‌، منیش وه‌کیلم نه‌بوو گوتم ئه‌وه‌ بۆ خۆتان ده‌زانن چۆن وه‌کیل له‌ نیزامی‌ کۆماری‌ ئیسلامی‌ دا ئه‌ویش به‌ تایبه‌ت بۆ ئێمه‌ی‌ کورد یا ئه‌وه‌ی‌ به‌ جورمی‌ حیزبی‌ دیموکراتی‌ کوردستانی‌ ئێران بگێرێن. گوتیان باشه‌ وه‌کیلێکی‌ ته‌سخیریت بۆ ده‌گرین، وه‌کیلی‌ ته‌سخیرییان به‌ نێوی‌ محه‌ممه‌د هیندی‌، بۆ گرتم. به‌و هیوایه‌ رۆژێک ئه‌و کابرایه‌ش ببینمه‌وه‌ تا پێی‌ بڵێم ئه‌تۆ چۆنت دیفاع له‌ ئێمه‌ کرد!
بردیانین بۆ دادگایه‌ک، کاتێک وه‌ژوور که‌وتین. قازی‌یه‌که‌ی‌ ئێمه‌ که‌سێک بوو که‌ ئاغای‌ هاشمزاده‌ی‌ پێ‌ده‌ڵێن که‌ خه‌ڵکی‌ ناوچه‌ی‌ مه‌هاباد‌و ده‌وروبه‌ره‌، هه‌موو ده‌یناسن هه‌موو له‌ جینایه‌ته‌کانی‌ وی‌ ئاگادارن هه‌تا ئێستا زیاتر له‌ پێنج شه‌ش که‌س له‌ تێکۆشه‌رانی‌ دیموکرات به‌ حوکمی‌ وی‌ ئێعدام کراون.
هه‌رکه‌ وه‌ژوور که‌وتم ئیهانه‌تێکی‌ گه‌وره‌ی‌ پێ‌کردم که‌ لێره‌دا بۆ گێڕانه‌وه‌ نابێ‌، چونکه‌ زۆر ناحه‌ز بوو، یه‌کی‌ دیکه‌ی‌ له‌کن راوه‌ستابوو ئه‌و لێی‌ وه‌جواب هات گوتی‌ ئه‌تۆ نابێ‌ ئه‌و قسانه‌ بکه‌ی‌، ئینسانی‌ زۆر گه‌وره‌ له‌ حیزبی‌ دیموکرات دا هه‌ن، خۆ به‌خۆ هه‌ر وا قسه‌یان ده‌کرد له‌ناکاو ئه‌و به‌ناو وه‌کیله‌ی‌ بۆ منیان گرتبوو ده‌با هاتبا دیفاعی‌ له‌من کردبا وه‌ژوور که‌وت، هه‌رکه‌وه‌ژوور که‌وت سڵاوی‌ کردوو ئێمه‌ش سڵاومان لێوه‌رگرته‌وه‌‌و یه‌کده‌فعه‌ چاوی‌ به‌من که‌وت، گوتی‌ کاکه‌گیان ئه‌تۆ "مفسد فی‌الارچ"ی‌ یانی‌ فاسیدی‌ سه‌ر ئه‌رزی‌. حاجی‌ ئاغاش پیاوی‌ چاکه‌. باوه‌ڕکه‌ له‌و دوو که‌لیمه‌ زیاتر یه‌ک که‌لیمه‌ی‌ دیکه‌ی‌ نه‌گوت یانی‌ هیچ دیفاعێکی‌ له‌من نه‌کرد هه‌ر که‌ ئه‌و دوو که‌لیمه‌ی‌ گوت وه‌ده‌رکه‌وت له‌ ژوورێ‌.
دوای‌ ئه‌و چه‌ند که‌لیمه‌ قسه‌ منیان برده‌وه‌ بۆ ئیداره‌ی‌ ئیتلاعات، پاش نزیک سێ‌ مانگان حوکمی‌ ئیعدام به‌ من درا. ئه‌وه‌ بۆ من شتێکی‌ ئاسایی‌ بوو. زۆر له‌مێژ بوو ده‌مزانی‌ ئه‌و حوکمه‌ بۆ من هه‌ر دێ‌، کاتێک حوکمه‌که‌یان پێ‌راگه‌یاندم، سروشتی‌یه‌ که‌ پێم ناخۆش بوو. راگه‌یاندنی‌ حوکمی‌ ئێعدام بۆ هه‌موو ئینسانێک ناخۆشه‌ به‌ڵام بۆ ئێمه‌ی‌ پێشمه‌رگه‌ مه‌عمووله‌ن شتێکی‌ ئاسایی‌یه‌ چون ئێمه‌ هه‌ر کات‌و ساتێک ده‌گه‌ڵ‌ مه‌رگ به‌ره‌ورووین ده‌یان جار تووشی‌ ده‌رگیری‌ بووینه‌، زۆرجار ده‌وره‌یان داوین له‌ ماڵاندا که‌وابوو ئه‌و حوکمه‌ش نه‌یتوانی‌ هیچ له‌ بیروباوه‌ڕی‌ ئێمه‌ که‌م بکاته‌وه‌.
پ: کاک مه‌حه‌ممه‌د! یه‌کێک له‌ تاکتیکه‌کانی‌ کۆماری‌ ئیسلامی‌ به‌گشتی‌، مه‌ئمووره‌کانی‌ ئیتلاعات چ له‌ زیندان چ له‌ دادگاکاندا چ له‌ نێو ئیداره‌ ئیتلاعاتی‌یه‌کاندا ئه‌وه‌یه‌ له‌ پێشدا به‌ زمانێکی‌ چه‌ور‌و شیرین‌و پڕ له‌ به‌ڵێنی‌‌و به‌قه‌ولی‌ خۆیان به‌ ئیحترامه‌وه‌ له‌ گه‌ڵ‌ تێکۆشه‌ری‌ سیاسی‌ روو به‌ روو ده‌ن. بۆوه‌ی‌ که‌ بتوانن ئیعترافیان لێوه‌رگرن، که‌ زانییان به‌و شێوه‌یه‌ به‌ هیچ کوێ‌ ناگه‌ن ده‌ست ده‌که‌ن به‌ فشاری‌ روحی‌‌و هه‌ڕه‌شه‌‌و گوڕه‌شه‌‌و ترساندن‌و تۆقاندن. سه‌باره‌ت به‌و جۆره‌ رفتارانه‌یان بۆمان بدوێ‌؟
و: مه‌عمووله‌ن که‌سێک که‌ حوکمی‌ ئێعدامی‌ پێ‌ده‌ده‌ن ئیدی‌ دوای‌ ماوه‌یه‌ک ئه‌گه‌ر ئیجرای‌ که‌ن ئه‌وه‌ موشه‌خه‌س ده‌کرێ‌، به‌ڵام به‌داخه‌وه‌ ئه‌من هه‌تا ئه‌و کاته‌ی‌ که‌ حوکمه‌که‌م شکا باوه‌ڕکه‌ به‌ ده‌یان جار ئه‌و حوکمه‌یان لـێ‌زیندوو ده‌کردمه‌وه‌. چه‌ند جاران هاتن که‌ ئیجرای‌ بکه‌ن جا ئیدی‌ به‌ هه‌ر شێوه‌یه‌ک بۆ خۆیان ده‌زانن یا به‌ چه‌ند هۆیه‌ک ئیجرایان نه‌کرد. به‌ڵام ئه‌وه‌ هه‌موو فشاری‌ روحی‌‌و ره‌وانی‌ بوو بۆ منیان ده‌هێنا. هه‌ر جارێ‌ ده‌هاتن که‌ ئه‌وه‌ حوکمه‌که‌ت شکاوه‌ یا جارێکی‌ دیکه‌ پێیان ده‌گوتم که‌ فڵان که‌س یان فڵان جێگا قبووڵی‌ نه‌کردوه‌، حوکمه‌که‌ هه‌ر له‌ جێی‌ خۆیه‌تی‌‌و هه‌ر ده‌بێ‌ ئێعدامت که‌ین. هه‌موو ئه‌وانه‌ فشاری‌ روحی‌‌و ره‌وانی‌ بوون بۆ منیان ده‌هێنا. به‌ڵام یه‌کێک له‌ شانازی‌یه‌کانم ئێستاش هه‌ر ئه‌وه‌یه‌ که‌ هیچ دڵسۆزێکی‌ حیزبی‌ یا ئه‌ندامێکی‌ حیزبی‌ به‌ ئیعترافی‌ من نه‌گیراوه‌، ئێستاش ئێمه‌ که‌ کادری‌ ئه‌و حیزبه‌ین یا پێشمه‌رگه‌ی‌ ئه‌و حیزبه‌ین، جێگای‌ متمانه‌ی‌ ئه‌و خه‌ڵکه‌ین له‌ ماوه‌ی‌ ئه‌و چه‌ند ساڵه‌ زندانی‌یه‌ که‌ له‌ زیندان بوومه‌ هه‌میشه‌ جێگای‌ متمانه‌ی‌ دڵسۆزانی‌ حیزب بووم. هه‌میشه‌ بیروڕایان ده‌گه‌ڵ‌ من ده‌گۆڕی‌یه‌وه‌ ئه‌وه‌ بۆ من شانازی‌یه‌. یا ئه‌وه‌ که‌ جاروبار ده‌هاتمه‌وه‌ مه‌ره‌خه‌سی‌، باوه‌ڕکه‌ ئه‌و خه‌ڵکه‌ ئه‌وه‌نده‌یان رێز‌و حورمه‌ت ده‌گرتم که‌ هیچ کات له‌بیری‌ ناکه‌م. به‌و هیوایه‌ بتوانین ئاوات‌و ئامانجی‌ شه‌هیده‌کانمان‌و خه‌ڵکی‌ کوردستان وه‌دی‌ بێنین.
پ: تکایه‌ له‌باره‌ی‌ تێکه‌ڵاوکردنی‌ به‌ندیی‌ سیاسیی‌‌و ناسیاسی‌ له‌ زیندانه‌کانی‌ کۆماری‌ ئیسلامی‌دا بۆمان بدوێ‌؟
و: له‌ زیندانی‌ ورمێ‌ به‌ندێکیان هه‌یه‌ به‌ ناوی‌ به‌ندی‌ دوازده‌ که‌ به‌ندی‌ سیاسییانی‌ پێ‌ده‌ڵێن به‌داخه‌وه‌ ئه‌وێش ئالووده‌ بووه‌ که‌ زۆرم پێ‌ناخۆشه‌ به‌ڵام له‌ زیندانی‌ مه‌هاباد که‌ من ماوه‌ی‌ زیندانی‌یه‌که‌م زیاتر له‌ مه‌هاباد بوو، له‌وێ‌ له‌گه‌ڵ‌ هه‌موو جۆره‌ ئینسانێک زیندانیم کێشاوه‌، قاتڵ‌ی‌ تێدا بوو، موعتادی‌ تێدا بوو، که‌سانی‌ دیکه‌ی‌ تێدا بوو که‌ له‌سه‌ر شتی‌ دیکه‌ گیرا بوون، ئینسانی‌ زۆر چاکیشی‌ تێدابوو پیاو حه‌ق بڵێ‌ مرۆڤی‌ زۆر موحته‌ره‌میشی‌ تێدابوو به‌ڵام به‌و حاڵه‌ش بۆ ئێمه‌ به‌ جورمی‌ سیاسی‌ گیرابووین یان پێشمه‌رگه‌ی‌ حیزب بووین، ناخۆشه‌ زیندانی‌ کێشان له‌گه‌ڵ‌ ئه‌و جۆره‌ ئه‌فراده‌. به‌و حاڵه‌ش ئێمه‌ ئه‌رکی‌ خۆمان له‌ ئه‌ستۆ بوو، ئه‌گه‌ر ئه‌وکاته‌ی‌ که‌ له‌ ده‌رێ‌ بووین خه‌ریکی‌ شێوه‌یه‌ک له‌ خه‌بات بووین، زیندانیش بۆخۆی‌ شێوه‌ موبارێزه‌که‌یه‌ که‌ ئینسانه‌ سیاسی‌یه‌کان ده‌بێ‌ هه‌میشه‌ ئه‌وه‌ له‌به‌رچاوگرن یانی‌ ئه‌و جۆره‌ی‌ که‌ پێویسته‌ ده‌بێ‌ شه‌خسییه‌تی‌ خۆیان‌و ئه‌و جه‌ره‌یانه‌ سیاسی‌یه‌ی‌ که‌ له‌سه‌ری‌ ده‌گیرێن رابگرن. به‌ڵێ‌ ده‌بێ‌ ئه‌وێش بکه‌ن به‌ مه‌یدانێکی‌ دیکه‌ی‌ تێکۆشان‌و خه‌بات ده‌گه‌ڵ‌ ئه‌و که‌سانه‌ی‌ که‌ په‌ره‌پێده‌ری‌ ئیعتیاد‌و دزی‌‌و فه‌سادن، هه‌روه‌ها رێنوێنی‌ کردنی‌ هێندێک له‌ ئه‌فراد، هه‌مووی‌ ئه‌وانه‌ له‌ ئه‌ستۆی‌ ئه‌و که‌سانه‌یه‌ که‌ به‌ جورمی‌ سیاسی‌ ده‌که‌ونه‌ ئه‌و شوێنانه‌.
پ: یانی‌ جه‌نابت وه‌کوو شورشگێڕێک به‌ ئه‌رکی‌ شۆرشگێڕانه‌ی‌ خۆتت ده‌زانی‌ که‌ له‌وێدا روون کردنه‌وه‌ت هه‌بێ‌‌و بۆ هێنانه‌ سه‌ررێی‌ ئه‌و که‌سانه‌ی‌ به‌جۆرێک چه‌واشه‌ کرابوون؟
و: به‌ڵـێ‌ زۆرکه‌س شاهیده‌ که‌ ئه‌من ئه‌وه‌نده‌ی‌ له‌ده‌ستم هاتوه‌ یا به‌ قسه‌یان کردوم ئه‌و که‌سانه‌م رێنوێنی‌ کردوه‌ به‌ تایبه‌ت ئه‌و که‌سانه‌ی‌ که‌ فکریان له‌گه‌ڵ‌ هێندێ‌ که‌سی‌ دیکه‌ فه‌رقی‌ هه‌بوو.
پ: هاوڕێ‌ گیان! وه‌ختێک به‌ندی‌یه‌کان زانییان جه‌نابت کادری‌ حیزبی‌ دیموکراتی‌ کوردستانی‌ ‌‌و به‌م شێوه‌یه‌ که‌وتوویه‌ته‌ ده‌ست ئه‌م دژی‌ گه‌لییانه‌، چۆن هه‌ڵسوکه‌وتیان له‌گه‌ڵ‌ ده‌کردی‌ له‌ باره‌ی‌ رێز‌و حورمه‌ت‌و له‌باره‌ی‌ متمانه‌وه‌ به‌ جه‌نابت؟
و: به‌ خۆشی‌یه‌وه‌ ئه‌من له‌ ماوه‌ی‌ ئه‌و نزیک به‌ نۆ ساڵه‌دا که‌ زیندانیم کێشاوه‌ له‌ ئیداره‌ی‌ ئیتلاعات‌و له‌ زیندانی‌ ورمێ‌‌و له‌ زیندانی‌ مه‌هاباد‌و له‌ زیندانی‌ تاران هیچ زیندانی‌یه‌ک بێ‌حورمه‌تیی‌ پێم نه‌کردوه‌، زۆرکاریان بۆ ده‌کردم، هه‌میشه‌ به‌ چاوی‌ رێزه‌وه‌ سه‌یریان کردوم، ئه‌من پێم وایه‌ به‌ هیچ شێوه‌یه‌ک ناتوانم باس له‌ فیداکاریی‌ ئه‌و که‌سانه‌ بکه‌م که‌ له‌ ماوه‌ی‌ ئه‌و نۆ ساڵه‌دا له‌گه‌ڵ‌ من هاوکارییان کردوه‌.
پ: ئاکامی‌ حوکمی‌ ئێعدامت چی‌ لێهات‌و جه‌نابت چۆن ئه‌و ده‌رفه‌ت‌و هه‌له‌ت بۆ ره‌خسا که‌ بگه‌ڕێنه‌وه‌ نێو ریزه‌کانی‌ حیزبی‌ دیموکرات؟
و: هاوینی‌ ساڵی‌ 2002 حوکمه‌که‌ی‌ من بوو به‌ ئه‌به‌د، دوای‌ چوار پێنج مانگان به‌ سه‌نه‌دێکی‌ زۆر، سه‌د‌و په‌نجا میلیۆن تمه‌ن مه‌ره‌خه‌سییان دا به‌ من بۆ ماوه‌ی‌ پێنج رۆژان دوای‌ ئه‌و پێنج رۆژه‌ ته‌قریبه‌ن هه‌ر به‌ مانگێ‌ جارێک چل‌و هه‌شت سه‌عات مه‌ره‌خه‌سییان ده‌دامێ‌. هه‌تا ئه‌مساڵ‌ که‌ به‌ زۆری‌ پێنج رۆژیان دامێ‌‌و له‌ ماوه‌ی‌ ئه‌و پێنج رۆژه‌دا له‌و ده‌رفه‌ته‌ که‌ڵکم وه‌رگرت‌و هاتمه‌وه‌ نێو ریزه‌کانی‌ حیزبی‌ دیمۆکراتی‌ کوردستان‌.
پ: له‌ هاتنه‌وه‌ت بۆ نێو ریزی‌ کادر‌و پێشمه‌رگه‌کانی‌ حیزبی‌ دیموکراتی‌ کوردستان هه‌ستت به‌چی‌ کرد؟
و: هه‌ستم به‌ شانازی‌‌و خۆشحاڵی‌ کرد که‌ توانیم بۆ جارێکی‌ دیکه‌ش هاوسه‌نگه‌رانی‌ رۆژانی‌ سه‌خت‌و دژوارم ببینمه‌وه‌.
پ: دواین پێشنیار‌و دوایین قسه‌ت بۆ گه‌لی‌ کورد له‌ رۆژهه‌ڵاتی کوردستان، تێکۆشه‌ران‌و زیندانییانی‌ سیاسی‌، بنه‌ماڵه‌ی‌ شه‌هیدان چیه‌؟
و: من له‌و حه‌دده‌دا نیم په‌یامێکم هه‌بێ‌ به‌ڵام داوا له‌ خه‌ڵکی‌ رۆژهه‌ڵاتی کوردستان ده‌که‌م که‌ ریزه‌کانیان یه‌کگرتووتر بکه‌ن، له‌وه‌ زیاتر پشتیوانی‌ له‌ حیزبی‌ دیموکراتی‌ کوردستان بکه‌ن، له‌ سه‌رانسه‌ری‌ کوردستان زیندانیی‌ سیاسیمان هه‌یه‌ یا بنه‌ماڵه‌ی‌ شه‌هیدمان هه‌یه‌ داوا له‌ خه‌ڵک ده‌که‌م سه‌ر له‌بنه‌ماڵه‌ی‌ شه‌هیدان بده‌ن سه‌ر له‌ زیندانییانی‌ سیاسی‌ بده‌ن. پێموابێ‌ ئه‌وه‌ هێندێک له‌ ده‌رد‌و ناره‌حه‌تی‌یه‌کان که‌ هه‌یانه‌ که‌م ده‌کاته‌وه
بگه‌ڕێوه|ده‌سپێک|بینێره‌ بۆ فه‌یس‌بوسکه‌که‌ت
ده‌ستپێک
ڕێبه‌رانی شه‌هید
ئاڵبۆمی نه‌مران
 
کۆمار
بانگه‌واز
په‌یوه‌ندی